UFC: Асу Алмабаев ТОП-5 кіруі мүмкін

MMACrossfire.com сайты UFC-дің ең жеңіл салмақтағы өкілі Асу Алмабаев келесі жекпе-жегінде жеңіске жетсе, дивизион рейтингінің үздік бестігіне кіруі мүмкін екенін хабарлады.

Асу Алмабаев 2026 жылғы 28 ақпанда Мексиканың астанасы Мехико қаласында UFC-дің бұрынғы чемпионы Брэндон Мореномен жекпе-жекке шығады.

Ол Астана уақыты бойынша 1 наурызда таңертең болады.

Қолда бар дерекке қарағанда, Алмабаев қазір UFC-дің ең жеңіл салмақ дәрежесіндегі рейтингінде жетінші орында тұр. Ол соңғы үш жекпе-жегінің екеуінде жеңіске жеткен. Оның біреуінде қараша айында Катарда өткен UFC турнирінде Алекс Пересті қылқындыру әдісімен жеңген.

Сол себепті 31 жастағы файтер келесі жекпе-жекте жеңіске жетсе үздік бестікке енуге үміттеніп отыр.

Дастан КЕНЖАЛИН,

АСТАНА