Jas palýannyń jarqyn jetistikteri

Jambyl oblysy, Taraz qalasynyń týmasy Nurasyl Asylhanuly Amanaly – búginde grek-rım kúresinen el nazaryn ózine aýdaryp júrgen jas sportshylardyń biri.

Nurasyl 2005 jylǵy 9 qańtarda týǵan. Bala kezinen sportqa beıim bolyp ósken ol grek-rım kúresin ómirlik joly retinde tańdady. Qazirgi tańda M.H. Dýlatı atyndaǵy Taraz óńirlik ýnıversıtetinde «Dene shynyqtyrý jáne sport» mamandyǵy boıynsha bilim alyp, oqý men sportty qatar alyp júrip keledi.

Jas palýannyń sporttaǵy jetistikteri de az emes. 2023 jyly Azııa chempıonatynda kúmis júldege ıe bolyp, osy nátıjesiniń negizinde oǵan halyqaralyq sport sheberi ataǵy berildi. Buǵan qosa, Nurasyl osy ýaqytqa deıin birneshe halyqaralyq týrnırlerdiń jeńimpazy jáne júldegeri atanyp, elimizdiń abyroıyn asqaqtatyp keledi.

2025 jyldyń 1–6 jeltoqsan aralyǵynda Almaty qalasynda ótken eresekter arasyndaǵy Qazaqstan chempıonatynda Nurasyl Amanaly joǵary deńgeıdegi beldesýler ótkizdi. 97 keli salmaq dárejesinde 1/8 fınalda Almaty oblysynyń sportshysy Damır Tursynovty 8:0 esebimen, 1/4 fınalda Túrkistan oblysynyń balýany E. Nasırdındi 8:0 esebimen, jartylaı fınalda astanalyq Maqsat Saılaýdy jeńip, fınalǵa joldama aldy.

Alaıda fınalda alǵan jaraqatyna baılanysty kúreske shyǵa almaı, nátıjesinde Qazaqstan chempıonatynyń kúmis júldesine ıelendi. Bul — jas sportshy úshin úlken jetistik ári bolashaq tabystyń bastamasy.

Nurasyldyń búgingi jetistikteri — onyń jeke eńbegimen qatar, bilikti bapkeri Saǵı Isaevtyń tynymsyz eńbeginiń jemisi. Saǵı Isaev — kezinde ózi de el namysyn qorǵaǵan, birneshe respýblıkalyq jáne halyqaralyq jarystardyń júldegeri atanǵan tájirıbeli sportshy. Búginde ol shákirt tárbıeleýde mol tájirıbesin tıimdi paıdalanyp keledi.

Nurasyl Amanaly — eńbekqorlyǵy men tabandylyǵynyń arqasynda bıik belesterdi baǵyndyryp kele jatqan jas sportshy. Aldaǵy ýaqytta da halyqaralyq arenalarda jeńis tuǵyrynan kórinedi degen senim mol.

Nurshahrızada SALIMOVA,

TARAZ