SportPress.kz قازاقستان سپورت جاڭالىقتارى
رەسەي قۇراما كومانداسى مەن انگليانىڭ «مانچەستەر يۋنايتەد» جانە «ەۆەرتون» كلۋبتارىنىڭ بۇرىنعى ويىنشىسى اندرەي كانچەلسكيس 2018 جىلى رەسەي الەم چەمپيوناتىنداعى ويىنداردى ساتىپ العانىن مالىمدەدى. بۇل تۋرالى ول رەسەيدىڭ باق وكىلدەرىنە بەرگەن سۇحباتىندا ايتتى.
سۇحباتتا كانچەلسكيس رەسەي ۇلتتىق قۇراماسىنىڭ قازىرگى جاعدايى، كوماندانىڭ باس جاتتىقتىرۋشىسى ستانيسلاۆ چەرچەسوۆ تۋرالى سىني پىكىرلەر ايتىپ، رەسەي فۋتبولىنىڭ سىيبايلاس جەمقورلىقتىڭ كەسىرىنەن جىلدان جىلعا قۇردىمعا كەتىپ بارا جاتقانىن جەتكىزدى. وسى رەتتە ەكس-فۋتبولشى 2018 جىلى رەسەيدە وتكەن الەمدىك دودادا ۇلتتىق قۇرامانىڭ جۇلدەلى ورىن الۋ ءۇشىن بارلىق ماتچتاردى ساتىپ الۋعا دەيىن بارعانىن جاسىرمادى.
ول ماتچ تۆ تىلشىسىنە بەرگەن سۇحباتتا سۇراقتارعا بىلاي دەپ جاۋاپ بەردى.
— الەم چەمپيوناتىنىڭ 1/4 فينالىنان كەيىن چەرچەسوۆتى (رەسەي قۇراماسىنىڭ باس جاتتىقتىرۋشىسى، — رەد) نەگە قولدامادىڭىز؟
— مەن ونى نەگە قولداۋىم كەرەك؟! ۇلتتىق قۇراما الەم چەمپيوناتىنداعى بارلىق ويىنداردى ساتىپ العانى ءۇشىن قولداۋىم كەرەك پە؟ ءسىز ويىندار تۋرالى ەستىمەدىڭىز بە؟ بىلمەدىڭىز بە؟ مەن وعان رەسەيدىڭ بارلىق ماتچتاردى ساتىپ العانى ءۇشىن العىس ايتۋىم كەرەك پە؟! ءبىز ءوز الاڭىمىزدا بارلىق ويىنداردى ساتىپ الدىق.
ءارى قاراي كانچەلسكيس رەسەي 2018 جىلى 2002 جىلعى وڭتۇستىك كورەيا مەن جاپونيا سياقتى الەم چەمپيوناتىندا جاقسى قىرىنان كورىنۋ ءۇشىن ءتۇرلى ايلا-تاسىلدەردى جاساعانىن اتاپ ءوتتى.
— ءبىز ءوز الاڭىمىزدا الەم چەميوناتىن وتكىزدىك. 2008 جىلى ەۋروپا چەمپيوناتىندا ەلىمىزدىڭ باس كومانداسى لايىقتى ونەر كورسەتىپ، ءۇشىنشى ورىن الدى. مىنە، ناتيجە دەپ وسىنى ايتۋعا بولادى. ال 2018 جىلى الەم چەمپيوناتىندا نە بولدى؟ ءبىزدىڭ قۇرامانى ءبارى العا سۇيرەدى. وسى سۇيرەۋدىڭ ارقاسىندا فينليانديا قۇراماسىن ۇتتىق. باسقا ەلدەردىڭ كوماندالارىمەن تەرەزەسى تەڭ وينادىق. بىراق ءبىزدىڭ ەلگە ءبىر نارسە عانا جەتىسپەي تۇردى. ول – الەم چەمپيوناتىنىڭ جۇلدەگەرى اتانۋ ەدى.
الەم چەمپيوناتى كەزىندە يسپانيا كورولى ماسكەۋگە بەكەر كەلگەن جوق. ونىڭ نە ءۇشىن كەلىپ-كەتكەنىن ۋاقىتىندا بىلەتىن بولاسىزدار. رەسەي مەن يسپانيانىڭ ويىنى وتە كۇماندى بولدى. بۇل كەزدەسۋدە يسپانيا دۇرىس ويناعان جوق، ولار دوپتى اسپانعا عانا تەۋىپ وينادى. مەنى فۋتبولدى بىلمەيدى دەپ ويلايسىزدار ما؟! فۋتبولدى بەس ساۋساعىمداي بىلەمىن. «بۇل ماتچتا يسپانيا رەسەيگە جول بەرۋى كەرەك» دەگەن اقپاراتتىڭ قايدان شىققانىن بىلەمىن.
— سوندا ينەستا مەن راموس، يسپانيانىڭ باسقا دا ويىنشىلارى ماتچتا ادەيى بار كۇش-جىگەرىن سالىپ وينامادى دەپ ويلايسىز با؟
— يسپانيا كورولى ىمداپ ايتسا، ولار ەشتەڭە دەي المايدى عوي. ماعان سەنبەسەڭىزدەر، وزدەرىڭىز بىلەسىزدەر. بىراق مەن ءبىر نارسەنى انىق بىلەمىن. يسپانيا كورولى كەلگەندە ناقتى كەلىسىم بولعان. مۇنى الەم چەمپيوناتىندا ويناعان فۋتبولشىلار دا، باسقا دا ادامدار راستاي الادى. ەرتە مە، كەش پە، بۇل تۋرالى ءبارى جارىسا جازىپ، بەتىمىزگە ايتاتىن بولادى.
داستان كەنجالين،
استانا
