Reseı 2018 jyly álem chempıonatyndaǵy oıyndardy satyp aldy – Kanchelskıs

Reseı qurama komandasy men Anglııanyń «Manchester ıýnaıted» jáne «Everton» klýbtarynyń burynǵy oıynshysy Andreı Kanchelskıs 2018 jyly Reseı álem chempıonatyndaǵy oıyndardy satyp alǵanyn málimdedi. Bul týraly ol Reseıdiń BAQ ókilderine bergen suhbatynda aıtty.

Suhbatta Kanchelskıs Reseı ulttyq quramasynyń qazirgi jaǵdaıy, komandanyń bas jattyqtyrýshysy Stanıslav Cherchesov týraly synı pikirler aıtyp, Reseı fýtbolynyń syıbaılas jemqorlyqtyń kesirinen jyldan jylǵa qurdymǵa ketip bara jatqanyn jetkizdi. Osy rette eks-fýtbolshy 2018 jyly Reseıde ótken álemdik dodada ulttyq quramanyń júldeli oryn alý úshin barlyq matchtardy satyp alýǵa deıin barǵanyn jasyrmady.

Ol Match TV tilshisine bergen suhbatta suraqtarǵa bylaı dep jaýap berdi.

— Álem chempıonatynyń 1/4 fınalynan keıin Cherchesovty (Reseı quramasynyń bas jattyqtyrýshysy, — red) nege qoldamadyńyz?

— Men ony nege qoldaýym kerek?! Ulttyq qurama álem chempıonatyndaǵy barlyq oıyndardy satyp alǵany úshin qoldaýym kerek pe? Siz oıyndar týraly estimedińiz be? Bilmedińiz be? Men oǵan Reseıdiń barlyq matchtardy satyp alǵany úshin alǵys aıtýym kerek pe?! Biz óz alańymyzda barlyq oıyndardy satyp aldyq.

Ári qaraı Kanchelskıs Reseı 2018 jyly 2002 jylǵy Ońtústik Koreıa men Japonııa sııaqty álem chempıonatynda jaqsy qyrynan kóriný úshin túrli aıla-tásilderdi jasaǵanyn atap ótti.

— Biz óz alańymyzda álem chemıonatyn ótkizdik. 2008 jyly Eýropa chempıonatynda elimizdiń bas komandasy laıyqty óner kórsetip, úshinshi oryn aldy. Mine, nátıje dep osyny aıtýǵa bolady. Al 2018 jyly álem chempıonatynda ne boldy? Bizdiń quramany bári alǵa súıredi. Osy súıreýdiń arqasynda Fınlıandııa quramasyn uttyq. Basqa elderdiń komandalarymen terezesi teń oınadyq. Biraq bizdiń elge bir nárse ǵana jetispeı turdy. Ol – álem chempıonatynyń júldegeri ataný edi.

Álem chempıonaty kezinde Ispanııa koroli Máskeýge beker kelgen joq. Onyń ne úshin kelip-ketkenin ýaqytynda biletin bolasyzdar. Reseı men Ispanııanyń oıyny óte kúmándi boldy. Bul kezdesýde Ispanııa durys oınaǵan joq, olar dopty aspanǵa ǵana teýip oınady. Meni fýtboldy bilmeıdi dep oılaısyzdar ma?! Fýtboldy bes saýsaǵymdaı bilemin. «Bul matchta Ispanııa Reseıge jol berýi kerek» degen aqparattyń qaıdan shyqqanyn bilemin.

— Sonda Inesta men Ramos, Ispanııanyń basqa da oıynshylary matchta ádeıi bar kúsh-jigerin salyp oınamady dep oılaısyz ba?

— Ispanııa koroli ymdap aıtsa, olar eshteńe deı almaıdy ǵoı. Maǵan senbeseńizder, ózderińiz bilesizder. Biraq men bir nárseni anyq bilemin. Ispanııa koroli kelgende naqty kelisim bolǵan. Muny álem chempıonatynda oınaǵan fýtbolshylar da, basqa da adamdar rastaı alady. Erte me, kesh pe, bul týraly bári jarysa jazyp, betimizge aıtatyn bolady.

Dastan KENJALIN,

ASTANA