Данияр Елеусінов титулынан айырылып қалуына менеджерлерін кінәлады

Кәсіпқой боксшы Данияр Елеусінов менеджерлер өзінің карьерасын құртты деп санайды. Бұл туралы meta-ratings.kz хабарлады.

Қазір 31 жастағы спортшы әлемге әйгілі британдық бокс промоутері Эдди Хирннен кетіп, Зия Әлиевпен жұмыс істеп жатыр.

Данияр Елеусінов кейінгі екі жылда бір-ақ рет жұдырықтасқан. Бірақ бұл чемпиондық жекпе-жек болды. 2021 жылдың желтоқсанында ол IBO әлем чемпионатының белбеуін иеленіп, содан кейін оны қорғау жекпе-жегінің жоқтығына байланысты титулынан айырылып қалды.

Бұған менеджерлерім кінәлі. Олар Эддимен жұмысты жалғастырудан бас тартты. Сосын мені жекпе-жексіз ұзақ ұстады, — деді боксшы.

Ол өзінің кейінгі кездесуінде аргентиналық Хуан Эрнан Леаоны төрешілер шешімімен жеңген еді.

Еркеғали БЕЙСЕНОВ,

АСТАНА