قول كۇرەستىڭ بىلىكتى جاتتىقتىرۋشىسى ستۋدەنتتەرمەن كەزدەستى

ەسەنوۆ ۋنيۆەرسيتەتىندە بىلىكتىلىگى جوعارى دەڭگەيدەگى جوعارى ساناتتى جاتتىقتىرۋشى، مۇنايلى اۋدانىندا قول كۇرەسى سپورتىن قالىپتاستىرعان سپورتشى يسەمباي ماتەنوۆ پەن شاكىرتى – الەم چەمپيوناتىنىڭ جۇلدەگەرى، ازيا چەمپيونى ىبىراي شولپانوۆ دەنە شىنىقتىرۋ جانە سپورت ماماندىعىنىڭ ستۋدەنتەرىمەن كەزدەسىپ، سۇراقتارعا جاۋاپ بەردى.

«ماڭعىستاۋ وبلىسىنداعى ارمسپورتتىڭ بۇگىنى جانە بولاشاعى» دەگەن تاقىرىپتاعى قوناق ءدارىستى «دەنە شىنىقتىرۋ جانە سپورت» كافەدراسىنىڭ مەڭگەرۋشىسى نۋرساپا احمەتوۆ ۇيىمداستىرىپ، جۇرگىزدى.

ي.ماتەنوۆتىڭ ءوزى وسى ۋنيۆەرسيتەتتىڭ تۇلەگى ەكەن. قازىر مۇنايلى اۋدانىندا قول كۇرەس ۇيىرمەسىندە جاتتىقتىرۋشى بولىپ جۇمىس ىستەيدى. بارىنشا سپورتقا ءوز ۇلەسىن قوسىپ كەلەدى. ماتەنوۆتىڭ شاكىرتتەرى الەم، ازيا جانە قازاقستان چەمپيوناتتارىندا جەڭىسكە جەتىپ ءجۇر. ول 4 الەم چەمپيوناتىنىڭ جۇلدەگەرىن، 15 ازيا چەمپيوناتىنىڭ جۇلدەگەرىن جانە 25 قازاقستان چەمپيونىن، 8 ازيا كۋبوگىنىڭ يەگەرىن  دايىنداپ شىعاردى.

ونىڭ شاكىرتتەرىنىڭ ءبىرى ارۋجان قوجاعالي دا وسى ۋنيۆەرسيتەتتىڭ 1-كۋرس ستۋدەنتى.

مەن قول كۇرەسكە ءۇش جىل بۇرىن كەلدىم. مۇنايلى اۋدانى №8 ورتا مەكتەپتىڭ 9-سىنىبىندا وقيتىن كەزىم. ءبىر كۇنى مەكتەپتە قول كۇرەسىنەن جارىس بولىپ، مەن 55 كگ سالماقتا قول كۇرەسكەم. سول كەزدە قارسىلاسىمنان جەڭىلىس تاۋىپ، نامىستانىپ قول كۇرەس ۇيىرمەسىنە قاتىستىم. جاتتىعۋ جاساي ءجۇرىپ چەمپيون بولسام دەگەن ماقسات تۇتتىم. سول ماقساتتى ورىنداپ بىلىكتى جاتتىقتىرۋشى يسەمباي اعايعا شاكىرت بولدىم. وسى ءۇش جىل ىشىندە وبلىس چەمپيونى بولىپ، قول كۇرەسىنەن سپورت شەبەرلىگىنە ۇمىتكەر اتاندىم. بىلتىر اقمولا وبلىسى شۋچە قالاسىندا وتكەن قازاقستان كۋبوگىندا ەكىنشى ورىن الدىم. ەندى الداعى ۋاقىتتا قىزۋ دايىندالىپ، ناۋرىز ايىندا وتەتىن قازاقستان چەمپيوناتىندا جەڭىمپاز اتانعىم كەلەدى، – دەدى ول.

كەش سوڭىندا جاتتىقتىرۋشى ي.ماتەنوۆ پەن شاكىرتى ى.شولپانوۆ ستۋدەنتتەرگە شەبەرلىك ساباعىن وتكىزدى.

ايبەك مۇحانوۆ،

قازاقستان جۋرناليستەر وداعىنىڭ مۇشەسى.

ماڭعىستاۋ وبلىسى،

 اقتاۋ قالاسى.