SportPress.kz Qazaqstan sport jańalyqtary
Esenov ýnıversıtetinde biliktiligi joǵary deńgeıdegi joǵary sanatty jattyqtyrýshy, Munaıly aýdanynda qol kúresi sportyn qalyptastyrǵan sportshy Isembaı Matenov pen shákirti – álem chempıonatynyń júldegeri, Azııa chempıony Ybyraı Sholpanov dene shynyqtyrý jáne sport mamandyǵynyń stýdenterimen kezdesip, suraqtarǵa jaýap berdi.
«Mańǵystaý oblysyndaǵy armsporttyń búgini jáne bolashaǵy» degen taqyryptaǵy qonaq dáristi «Dene shynyqtyrý jáne sport» kafedrasynyń meńgerýshisi Nýrsapa Ahmetov uıymdastyryp, júrgizdi.
I.Matenovtiń ózi osy ýnıversıtettiń túlegi eken. Qazir Munaıly aýdanynda qol kúres úıirmesinde jattyqtyrýshy bolyp jumys isteıdi. Barynsha sportqa óz úlesin qosyp keledi. Matenovtiń shákirtteri álem, Azııa jáne Qazaqstan chempıonattarynda jeńiske jetip júr. Ol 4 álem chempıonatynyń júldegerin, 15 Azııa chempıonatynyń júldegerin jáne 25 Qazaqstan chempıonyn, 8 Azııa kýbogynyń ıegerin daıyndap shyǵardy.
Onyń shákirtteriniń biri Arýjan Qojaǵalı da osy ýnıversıtettiń 1-kýrs stýdenti.
Men qol kúreske úsh jyl buryn keldim. Munaıly aýdany №8 orta mekteptiń 9-synybynda oqıtyn kezim. Bir kúni mektepte qol kúresinen jarys bolyp, men 55 kg salmaqta qol kúreskem. Sol kezde qarsylasymnan jeńilis taýyp, namystanyp qol kúres úıirmesine qatystym. Jattyǵý jasaı júryp chempıon bolsam degen maqsat tuttym. Sol maqsatty oryndap bilikti jattyqtyrýshy Isembaı aǵaıǵa shákirt boldym. Osy úsh jyl ishinde oblys chempıony bolyp, qol kúresinen sport sheberligine úmitker atandym. Byltyr Aqmola oblysy Shýche qalasynda ótken Qazaqstan kýbogynda ekinshi oryn aldym. Endi aldaǵy ýaqytta qyzý daıyndalyp, naýryz aıynda ótetin Qazaqstan chempıonatynda jeńimpaz atanǵym keledi, – dedi ol.
Kesh sońynda jattyqtyrýshy I.Matenov pen shákirti Y.Sholpanov stýdentterge sheberlik sabaǵyn ótkizdi.
Aıbek MUHANOV,
Qazaqstan Jýrnalıster Odaǵynyń múshesi.
Mańǵystaý oblysy,
Aqtaý qalasy.
