«گازپروم» ورتالىق ازيانىڭ العاشقى چەمپيوناتىنا دەمەۋشىلىك جاسايدى

رەسەيدىڭ «گازپروم» اكتسيونەرلىك قوعامى فۋتبولدان العاش رەت تاشكەنت پەن بىشكەكتە ورتالىق ازيا فۋتبول اسسوتسياتسياسىنىڭ ۇيىمداستىرۋىمەن وتەتىن ورتالىق ازيا چەمپيوناتىنا قارجىلاي كومەك كورسەتءۋدى جوسپارلاپ وتىر.

CAFA ۇيىمى 2014 جىلى قۇرىلعان. وعان اۋعانستان، يران، قىرعىزستان، تاجىكستان، تۇرىكمەنستان جانە وزبەكستان فەدەراتسيالارى كىرەدى.

تۋرنير 9-21 ماۋسىمدا بىشكەك پەن تاشكەنتتە وتەدى دەپ جوسپارلانىپ وتىر. وعان سەگىز قۇراما قاتىسادى.

قازىر چەمپيوناتقا قاتىسۋعا CAFA-نىڭ التى مۇشەسىنىڭ ءبارى – اۋعانستان، يران، قىرعىزستان، تاجىكستان، تۇرىكمەنستان جانە وزبەكستان قاتىسۋعا كەلىسىم بەرىپ قويدى.

بۇل جارىسقا رەسەي قۇراماسى دا قاتىسادى. بىراق ودان ازىرشە ءوتىنىم كەلىپ تۇسكەن جوق. ودان باسقا CAFA ۇيىمى ازيا ەلدەرىنىڭ ءبىرىن چەمپيوناتقا قاتىستىرۋعا نيەت ءبىلدىرىپ وتىر. قولدا بار مالىمەتكە قاراعاندا، جارىسقا قاتىساتىن سوڭعى، سەگىزىنشى كوماندا تايلاند قۇراماسى بولۋى مۇمكىن.

ءتۋرنيردىڭ ەرەجەسى بويىنشا، سەگىز كوماندا ءتورت-تورتتەن ەكى توپقا ءبولىنىپ وينايدى. ءبىر توپتىڭ ويىندارى – تاشكەنتتە، ەكىنشىسىنىكى بىشكەكتە وتەدى.

توپتاردىڭ جەڭىمپازدارى فينالدا كەزدەسەدى. ال ءوز كۆارتەتىندە ەكىنشى بولعان كوماندالار قولا جۇلدەنى ءوزارا ساراپقا سالادى. بۇل ەكى فينالدىق ماتچ تا تاشكەنتتە بولادى.

داستان كەنجالين،

استانا