Boksshy Mahmud Sabyrhanǵa eki bólmeli páter berildi

Bokstan álem chempıony Mahmud Sabyrhanǵa Shymkentten eki bólmeli páter berildi.

Shymkent qalasynyń ákimi Murat Áıtenov bokstan álem chempıony Mahmud Sabyrhan men onyń jeke jattyqtyrýshysy Ilııas Oralbekovpen kezdesip, syı-syıapat kórsetti.

Bokstan Qazaqstan ulttyq quramasynyń múshesi Mahmud Sabyrhan Tashkentte ótken álem chempıonatynda 54 kelige deıingi salmaq dárejesinde jeńis tuǵyryna kóterilgen bolatyn. Osy dodada ol quramanyń qorjynyna ekinshi altyn júldeni ákeldi. Ol  1/32 fınaldan bastap, Kýba, Gana, Úndistan men Vengrııa sportshylaryn asa qınalmaı utyp, fınalda sharshy alań ıesi, ózbekstandyq Aıbek Djýraevty eki márte nokdaýnǵa jiberdi.

Kezdesýde Shymkenttiń ákimi sportshy men onyń jeke jattyqtyrýshysyn quttyqtap, aldaǵy Azııa jáne Olımpııalyq oıyndarda sáttilik tiledi. Osy jerde ol boksshyǵa elıtalyq Tengri turǵyn úı kesheninen eki bólmeli páterdiń kiltin, al jattyqtyrýshyǵa 5 mln teńgeniń sertıfıkatyn tabys etti.

Dastan KENJALIN,

ASTANA