Abay CUP-تا «اباي» مەكتەبى توپ جاردى (فوتو)

استانادا 1 ماۋسىم – بالالاردى حالىقارالىق قورعاۋ كۇنى شاعىن فۋتبولدان Abay CUP ءتۋرنيرى ءوتتى.

ەلورداداعى اباي قۇنانباي ۇلى اتىنداعى №87 مەكتەپ-گيمنازياسىنىڭ قولداۋىمەن وتكەن تۋرنيرگە 2012-2013 جىلى تۋعان بالالاردان قۇرالعان التى كوماندا قاتىستى. بۇل جولعى ءتۋرنيردىڭ ەرەكشىلىگى، ارنايى چەلەنجدەن باستالدى. ياعني، ءبىر ۋاقىتتا استاناداعى بىرنەشە مەكتەپتە ءدال وسىنداي تۋرنير باستاۋ الدى. سونداي-اق، قاتىسۋشى بارلىق كومانداعا جۇلدەلەر مەن مەدالدار ۇلەستىرىلدى.

جارىس اينالمالى جۇيەدە ءوتتى. ەرەجەگە ساي بارلىق كوماندا ءبىر-بىرىمەن ءوزارا كەزدەسىپ، جەڭىمپازدى انىقتادى.

بالالارىمىزدىڭ دەنى ساۋ بولۋى ءۇشىن سپورتپەن اينالىسۋ كەرەك ەكەنى بەلگىلى. سول ماقساتتا ءبىز 1 ماۋسىم – بالالاردى قورعاۋ كۇنىنە وراي فۋتبولدان قالالىق تۋرنير ۇيىمداستىرىپ وتىرمىز. بۇل كۇن بالالار ءۇشىن مەيرام. سول سەبەپتى دە تۋرنيرگە قاتىسقان بالالاردىڭ بارلىعى جۇلدەگە يە بولادى. مۇنداي جارىستار مەكتەبىمىزدە كوپتەپ ۇيىمداستىرىلىپ كەلەدى، – دەيدى مەكتەپ ديرەكتورى ايگۇل قاشاەۆا.

تۋرنير قورىتىندىسى بويىنشا ەكى توپتان سۋىرىلىپ شىققان ءتورت كوماندا جارتىلاي فينالدا كەزدەسىپ، فينالدا قاي كوماندانىڭ وينايتىنىن انىقتادى. ناتيجەسىندە فينالدا Alash-2014 كومانداسىن 5:3 ەسەبىمەن جەڭگەن Namys كومانداسىنان جاساقتالعان «اباي» مەكتەبى جەڭىمپاز اتانسا، ءۇشىنشى ورىندى «بىرلىكتەن» 2:1 ەسەبىمەن باسىم بولعان «قازعارىش» مەكتەبى تۇيىندەدى.

بىزگە وسىنداي تۋرنيرلەر ۇنايدى. سەبەبى، بۇل تۋرنير جەڭىسكە جەتۋىمىزگە، چەمپيون بولۋىمىزعا موتيۆاتسيا بەرەدى. Abay CUP ءتۋرنيرىن ۇيىمداستىرۋشىلارعا راحمەت ايتامىن، – دەيدى «اباي» مەكتەبىنىڭ وقۋشىسى زاڭعار ابدىكەرىم.

اتالعان تۋرنيردە جەكەلەي كوماندالاردان بولەك، جەكەلەي ويىنشىلاردىڭ دا شەبەرلىگى ەسكەرىلدى. «ەڭ ۇزدىك قاقپاشى» اتالىمى – انۋار جاقانعا (Namys)، «ەڭ ۇزدىك قاقپاشى» – جالعاس سەرىككە (Alash)، «ەڭ ۇزدىك قورعاۋشى» – دارحان شاكيرگە («بىرلىك»)، «ەڭ ۇزدىك شابۋىل¬شى» – ءاليحان داۋلەتبەككە («قازعارىش»)، «ەڭ ۇزدىك ويىنشى» مانسۇر امانگەلدىگە (Alash) بۇيىردى.

 

داستان كەنجالين،

فوتو: ادىلبەك تاۋەكەلوۆ

استانا