XIX ازيا ويىندارى: قازاقستان ۇشىنشى جۇلدەنى الدى

قىتايدىڭ حانچجوۋ قالاسىنان تاعى ءبىر قۋانىشتى حابار جەتتى. قازاقستان سپورتشىلارى ازيادادا ءۇشىنشى مەدالدى جەڭىپ الدى.

بۇل جۇلدەنى تاپانشامەن وق اتۋدان 25 مەتر قاشىقتىقتاعى نىسانانى ءدال كوزدەگەن نيكيتا چيريۋكين يەلەندى. ءسويتىپ، ول قازاقستان قۇراماسىنا ەكىنشى قولا مەدالدى سىيلادى. ال وسى جارىستا باس جۇلدەنى قىتاي سپورتشىسى لي يۋحونگ يەلەندى. نيكيتا چيريۋكين 26 ۇپاي جينادى.

نيكيتا — كوپتەگەن بەدەلدى جارىستاردىڭ جەڭىمپازى جانە جۇلدەگەرى.  بۇگىن دە ول بيىكتەن كورىندى. باسەكەلەستىك قيىن بولعانىنا قاراماستان ول ءوزىنىڭ شەبەرلىگىن كورسەتتى. نيكيتانى، ونىڭ كوماندالاستارى مەن جاتتىقتىرۋشىلارىن وسى جۇلدەمەن قۇتتىقتايمىن،- دەدى تۋريزم جانە سپورت ءمينيسترى ەرمەك مارجىقپاەۆ.

ازىرشە قازاقتان جالپىكوماندالىق ەسەپتە ۇزدىك بەس ەلدىڭ قۇراماسىنىڭ تىزىمىنە كىرگەن جوق. بۇل تىزىمدە ەكى التىن جۇلدەدەن كوپ مەدال العان ەلدەردىڭ وكىلدەرى بار. سونىڭ ىشىندە كورشىلەس وزبەكستاننىڭ سپورتشىلارى 3 التىن، 4 كۇمىس جانە 3 قولا مەدالمەن ءتورتىنشى ورىندا تۇر. ال توپتى قىتاي ساڭلاقتارى باستاپ كەلەدى. ولار 27 التىن، 11 كۇمىس جانە 5 قولا جۇلدەنى يەلەنگەن. ودان كەيىنگى ورىندا 5 التىن، 6 كۇمىس جانە 6 قولا مەدالمەن وڭتۇستىك كورەيا ورنالاسقان.

ءۇشىنشى ورىندى 3 التىن، 9 كۇمىس جانە 6 قولا جۇلدەمەن جاپون سپورتشىلارى يەلىك ەتىپ وتىر. ءتورتىنشى ورىندا وزبەكستان بولسا، ۇزدىك بەستىكتى گونكوگتىڭ قىز-جىگىتتەرى تۇيىندەدى. ولاردا 2 التىن، 2 كۇمىس جانە 6 قولا جۇلدە بار.

داستان كەنجالين،

استانا

فوتو: تۋريزم جانە سپورت مينيسترلىگى