XIX ازيادا: 27 قىركۇيەكتەگى جارىس كۇنىنىڭ ناتيجەلەرى

كەشە قىتايدىڭ حانچجوۋ قالاسىندا ءوتىپ جاتقان ازيا ويىندارىندا قازاقستان كومانداسى ءبىر التىن جانە ەكى قولا مەدال جەڭىپ الدى.

ستەند اتۋ:

ساپىندا اسەم ورىنباي، زويا كراۆچەنكو جانە ولگا پانارينا بار قازاقستاننىڭ ايەلدەر كومانداسى سكيت باعدارلاماسىندا التىن مەدال جەڭىپ الىپ، ازيا ويىندارىنىڭ رەكوردىن (350 بالل) ورناتتى.

ال جەكەلەي سىندا اسەم ورىنباي قولا جۇلدەگە يە بولدى.

ءجۇزۋ:

ۆاتتەرفلياي ادىسىمەن (100 مەتر) ءجۇزۋدىڭ فينالدىق كەزەڭىندە ادىلبەك مۋسين 51.86 سەكۋندتا مارەگە جەتىپ، قولا مەدال جەڭىپ الدى.

ۋ-شۋ ساندا:

52 كەلىگە دەيىنگى سالماق دارەجەسىندە ونەر كورسەتكەن ايان تۇرسىن قولا جۇلدەگە يە بولدى.

بوكس:

ەكى دۇركىن الەم چەمپيونى نازىم قىزايباي (50 كگ) نەپالدان كەلگەن قارسىلاسى سۋسما تامانگتى – 5:0 ەسەبىمەن سەنىمدى تۇردە ۇتتى، ال ساعىندىق توعامباي موڭعوليادان كەلگەن بارياحاان دورجدى ەكىنشى راۋندتا مەرزىمىنەن بۇرىن جەڭدى. كەشكى سەسسيادا ەرتۋعان زەينۋللينوۆ (63،5 كگ) تاجىكستاننان كەلگەن بوكسشى باحودۋر ۋسمونوۆتى 3:2 ەسەبىمەن جەڭدى.

تەننيس:

ارالاس جۇپتا جىبەك قۇلامباەۆا مەن گريگوري لوماكين 32 مينۋت ىشىندە تاجىكستاننان كەلگەن قارسىلاستارىن 6:0، 6:1 ەسەبىمەن جەڭىپ، جارىستىڭ كەلەسى كەزەڭىنە شىقتى.

3x3 باسكەتبول:

قازاقستاننىڭ ايەلدەر كومانداسى نەپال قۇراماسىن 17:10 ەسەبىمەن جەڭدى.

گاندبول:

قازاقستان ايەلدەر كومانداسى توپتىق ىرىكتەۋ كەزەڭىندە وزبەكستان قۇراماسىن 37:33 ەسەبىمەن ۇتتى.

ءتورتىنشى  جارىس كۇنىنىڭ قورىتىندىسى بويىنشا قازاقستان قۇراماسىنىڭ قورجىنىندا 1 التىن، 2 كۇمىس جانە 7 قولا جۇلدە بار.

تۋريزم جانە سپورت مينيسترلىگى

فوتو: تۋريزم جانە سپورت مينيسترلىگى