سەمسەرلەسۋ: قازاقستان قۇراماسى — ازيا چەمپيوناتىنىڭ كۇمىس جۇلدەگەرى!

مادەنيەت جانە سپورت مينيسترلىگى سپورتتى دامىتۋ ديرەكتسياسىنىڭ حابارلاۋىنشا، سەمسەرلەسۋدەن ەلىمىزدىڭ ەرلەر قۇراماسى قىتايدىڭ ۋسي قالاسىندا ءوتىپ جاتقان ازيا چەمپيوناتىندا كۇمىس جۇلدەگە يە بولدى. فينالدا وتانداستارىمىز جاپونياعا جول بەردى.

رۋسلان كۋربانوۆ، ەلمير ءƏلىمجانوۆ، ۆاديم شارلايموۆ پەن ەرلىك سەرتاي 1/8 اينالىمدا فيليپپيننەن 45:37 ەسەبىمەن باسىم ءتۇستى.  سوسىن وسى تورتتىك 45:40 ەسەبىمەن وزبەكستان سپورتشىلارىن ۇتتى. ال جارتىلاي فينالدا قۇرىلىقتاعى كوشباسشىنىڭ ءبىرى وڭتۇستىك كورەيانى جەڭدى. ەسەپ — 42:36.

بۇل — قازاقستاننىڭ ۋسي قالاسىنداعى بيىلعى چەمپيوناتتا جەڭىپ العان العاشقى جۇلدەسى. مۇندا پاريج وليمپياداسىنا قاتىسۋعا مۇمكىندىك بەرەتىن رەيتينگ ۇپايلارى ءۇشىن 20 ەلدەن كەلگەن 400-گە تارتا سپورتشى سىنعا ءتۇسىپ جاتىر.

شامكەن بايىربەك،

استانا