SportPress.kz قازاقستان سپورت جاڭالىقتارى
قازاقستان مەن فينليانديا كوماندالارىنىڭ ماتچى الدىندا ۇلتتىق قۇرامانىڭ باس جاتتىقتىرۋشىسى ماگومەد اديەۆ، كوماندانىڭ ويىنشىلارى اسحات تاعىبەرگەن مەن باحتيەر زاينۋتدينوۆ ويىنعا 100 پايىز دايىن ەكەندەرىن ايتتى.
ءبىز ماتچقا 100 پايىزعا دايىنبىز. جانكۇيەرلەرىمىزدى جەڭىسپەن قۋانتقىمىز كەلەدى. ءبىز بۇعان دەيىن دە وينادىق. ەندى قازاقستان قۇراماسىنىڭ جانكۇيەرلەرىن تاعى دا قۋانتامىز دەپ ۇمىتتەنەمىز.
ارينە، ويىنعا ءبىز دايىنبىز. ەرتەگى اتانعان دانيامەن ويىننان كەيىن تاعى دا جەڭىسكە جەتەمىز دەپ سەنەمىز. بۇرىن فينليانديانى جەڭگەن جوقپىز با؟ ءدال وسىنداي جاعداي دانيامەن دە بولدى.
ءبىز جانكۇيەرلەر ءۇشىن، حالقىمىز ءۇشىن وينايمىز. ەرتەڭ بىزگە سەنەتىن جانە بىزدەن جەڭىس كۇتەتىن بارلىق جانكۇيەرلەردى كۇتەمىز!
ءبىز بيىلعا دەيىن دانيانى دا جەڭبەگەن ەدىك. ال بيىل دانيا قۇراماسىن جەڭدىك. سوندىقتان ەرتەڭگى ماتچتا فينليانديانى ۇتۋعا تىرىسامىز، – دەدى كوماندا كاپيتانى اسحات تاعىبەرگەن.
ال باحتيەر زاينۋتدينوۆ ەلىمىزگە كەلىپ، ۇلتتىق قۇراماعا قوسىلعانىنا قۋانىشتى ەكەنىن اتاپ ءوتتى.
جاقسى كوڭىل-كۇيدەمىز. مەن بارلىق جىگىتتەردى ساعىندىم. قازاقستاندى ساعىندىم. ەرتەڭگى ويىنعا دايىندالىپ جاتىرمىز. ءبىزدى ەرتەڭ تاماشا كەش كۇتىپ تۇر. ءبىز ونى اسىعا كۇتىپ ءجۇرمىز.
فينليانديا ءۇش كۇننەن بەرى جاساندى توسەنىشتە جاتتىعىپ جاتىر. ولار الاڭعا ۇيرەنىپ العان.
ەڭ باستىسى، بىزگە جەڭىس كەرەك. ويىندا كوماندا قۇرامىندا كىمنىڭ گول سالعانى ماڭىزدى ەمەس. بىزگە جەڭىسكە جەتۋ ماڭىزدى، – دەدى ول.
سونداي-اق ول تۇركيانىڭ «بەشيكتاش» كلۋبىنا قاتىستى سۇراققا جاۋاپ بەرىپ، ازداپ قىمبات باعاعا ساتىلىپ كەتكەنىن جاسىرمادى.
تسسكا مەنى ازداپ قىمبات باعاعا ساتتى. مەن مۇنى كۇتپەپ ەدىم، — دەدى فۋتبولشى.
ۇلتتىق قۇرامانىڭ باس جاتتىقتىرۋشىسى جاڭا فۋتبولشىلاردىڭ شاقىرىلعانىن، وسى جىگىتتەر ۇجىمعا تەز ءسىڭىسىپ، كوماندالاستارىنا ۇلكەن قولداۋ بولاتىنىنا سەنىم ءبىلدىردى.
ەرتەڭ – 7 قىركۇيەكتە استانادا كەشكى ساعات 20:00-دە 2024 جىلعى ەۋروپا چەمپيوناتىنىڭ ىرىكتەۋ ءتۋرنيرى اياسىندا قازاقستان مەن فينليانديا ۇلتتىق قۇرامالارىنىڭ ماتچى باستالادى.
داستان كەنجالين،
فوتو: جاندوس ساردەنوۆ،
استانا
