SportPress.kz قازاقستان سپورت جاڭالىقتارى
پورتۋگاليا قۇراماسى 2024 جىلعى ەۋروپا چەمپيوناتىنا ىرىكتەۋ ءتۋرنيرى اياسىندا J توبىندا ليۋكسەمبۋرگ كومانداسىن 9:0 ەسەبىمەن جەڭىپ، رەكورد جاڭارتتى.
بۇل ماتچ پورتۋگاليانىڭ فارۋ قالاسىندا بولدى. ويىندا پورتۋگاليا قۇراماسىندا گونسالۋ يناسيۋ (12 جانە 45-مينۋت)، گونسالۋ رامۋش (18، 34) مەن ديوگۋ جوتا (57، 77) دۋبل جاساسا، ريكاردۋ ورتا (67)، برۋنۋ فەرناندەش (83) پەن جواۋ فەليكس (88) ءبىر-ءبىر گولدان سالدى.
بۇل ماتچتا پورتۋگاليالىقتار كريشتيانۋ رونالدۋسىز وينادى. 38 جاستاعى فورۆارد ەسكەرتۋ تۇرىندەگى سارى قاعازدىڭ سانى اسىپ كەتكەندىكتەن ويىنعا قاتىسا المادى. بۇعان دەيىن رونالدۋ ەۋرو-2024 ىرىكتەۋ تۋرنيرىندە بەس گول سالعان ەدى.
بۇل — پورتۋگاليا قۇراماسىنىڭ تاريحتاعى ەڭ ۇلكەن ەسەپپەن جەڭىسى. وسىعان دەيىن پورتۋگاليالىقتار 1994 جانە 1999 جىلدارى ليحتەنشتەين كومانداسىن 8:0 ەسەبىمەن ۇتقان. 2003 جىلى كۋۆەيت قۇراماسىن دا 8:0 ەسەبىمەن جەڭگەن ەدى.
وسىلايشا، پورتۋگاليا ەۋرو-2024 ىرىكتەۋ تۋرنيرىندە J توبىنداعى التى ماتچىڭ بارىندە جەڭىسكە جەتىپ، 18 ۇپايمەن ءبىرىنشى ورىندا كەلە جاتىر.
داستان كەنجالين،
استانا
