Azıadaǵa qatysqan sportshylardyń alǵashqy legi elge keldi

Almaty halyqaralyq áýejaıyna  Hanchjoýdaǵy jazǵy Azııa oıyndaryna qatysqan 50-den astam sportshy ushyp keldi.

Olardyń arasynda Azııa oıyndarynda bessaıystan alǵash ret Olımpıada lıenzııasyn jeńip alǵan Elena Potapenko men Georgıı Boroda-Dýdochkın bar.

Ázirshe Azıadada tórt kúnniń nátıjesi boıynsha elimizdiń sportshylary 2 kúmis, 7 qola júlde aldy.

Hanchjoýda ótip jatqan jazǵy Azııa oıyndary 8 qazanǵa deıin jalǵasady.

Al keshe Azııa oıyndarynda Qazaqstan quramasynyń qorjyny 1 kúmis, 3 qola medalmen tolyqty.

Quramynda Baqtııar Ybyraev, Andreı Hýdıakov men Asadbek Názirqulov bar Qazaqstan komandasy 10 metrden nysana kózdeýden Azııa oıyndarynyń kúmis júldesin jeńip aldy.

Aralas sanattaǵy pnevmatıkalyq myltyqtan 10 metrden nysana kózdeý jarysynda Islam Sátbaev pen Aleksandra Le juby úshinshi oryn ıelendi.

Dzıýdoshy Nurlyhan Sharhan 100 kelige deıingi salmaq dárejesinde Azıadanyń qola medalin jeńip aldy. Ol Ońtústik Koreıadan kelgen qarsylasy Djonhýn Vondy ıppon ádisimen utty.

Semserlesý sportynan synǵa túsken Elmır Álimjanov Azııa oıyndarynyń qola júldesin ıelendi. Ol osymen Azıadaǵa tórtinshi ret qatysyp, alǵash ret medal aldy.

Sabyrhan Mahmud Azııa oıyndaryn senimdi bastady. Boksshy alǵashqy jekpe-jeginde Ońtústik Koreıa ókili Lı Ie Chandy 5:0 esebimen jeńdi.

Denıs Evseev úlken tennısten úshinshi aınalymda Taıpeı sportshysyn 2:1 esebimen basym tústi.

Týrızm jáne sport mınıstrligi

FOTO: Týrızm jáne sport mınıstrligi