XIX ازيادا: قازاقستان توپ-10 ەلدىڭ قاتارىنا كىردى

قىتايدىڭ حانچجوۋ قالاسىندا ءوتىپ جاتقان ازيا ويىندارىندا قازاقستان قۇراماسى بۇگىنگى ەكى التىن جۇلدەءنىڭ جانە كۇمىس پەن قولا مەدالداردىڭ ارقاسىندا جالپىكوماندالىق ەسەپتە توعىزىنشى ورىنعا شىقتى.

توپ باسىنا الاڭ يەلەرى – قىتاي حالىق رەسپۋبليكاسىنىڭ سپورتشىلارى ورنالاسىپ وتىر. ولار 81 التىن، 45 كۇمىس جانە 23 قولا مەدال الدى. ەكىنشى ورىندا وڭتۇستىك كورەيانىڭ وكىلدەرى كەلەدى. تاڭعى شىق ەلىنىڭ سپورتشىلارى 20 التىن، 19 كۇمىس جانە 35 قولا جۇلدەنى جەڭىپ الدى. ودان كەيىنگى ساتىدا جاپونيا قۇراماسى تۇر. كۇنشىعىس ەلىنىڭ وكىلدەرىندە 15 التىن، 27 كۇمىس جانە 24 قولا مەدال بار.

ولاردىڭ وكشەسىن وزبەكستان ساڭلاقتارى باسىپ كەلەدى. بۇل ەل العاش رەت ءوز تاريحىندا جالپىكوماندالىق ەسەپتە تورتتىككە كىردى. بۇل مەملەكەتتىڭ وكىلدەرى ازىرشە 6 التىن، 10 كۇمىس جانە 13 قولا مەدالدى جەڭىپ الدى. سودان كەيىن ۇزدىك بەستىكتە ءۇندىستان سپورتشىلارى بار.  ۇندى ەلى 6 التىن، 8 كۇمىس جانە 10 قولا جۇلدەمەن بەسىنشى ورىنعا شىقتى.

ودان كەيىنگى ورىنداردا تايلاند، گونكونگ، يران ەلدەرىنىڭ سپورتشىلارى كەلەدى. قازاقستان سپورتشىلارى 3 التىن، 3 كۇمىس جانە 10 قولا مەدالمەن توعىزىنشى ورىندا كوتەرىلدى.

قازاقستاننىڭ وكشەسىن يندونەزيا باسىپ كەلەدى. ولاردا دا  3 التىن مەن 3 كۇمىس جۇلدە. بىراق ەكى قولا جۇلدەسى عانا بار.

قازاقستان سپورتشىلارىنىڭ ماقساتى – ازيادا سوڭىنا دەيىن ۇزدىك بەستىكتە بولۋ. قازىر حانچجوۋداعى ازياداعا ەلىمىزدەن سپورتتىڭ 30 تۇرىنەن 524 سپورتشى (262 ەر جانە 262 ايەل) قاتىسىپ جاتىر. ونىڭ 27-ءسى وليمپيالىق باعدارلاماعا كىرسە، قالعان 3-ءى وليمپيالىق ەمەس سپورت تۇرلەرى. سونىمەن قاتار، ازيادادا 8 سپورت تۇرىنەن، اتاپ ايتقاندا، بوكس، ساداق اتۋ، قازىرگى بەسسايىس، ءجۇزۋ، برەيكينگ، كوگالداعى حوككەي، تەننيس جانە جەڭىل اتلەتيكا بويىنشا پاريج وليمپياداسىنا  ليتسەنزيالار ساراپقا سالىنادى.

جالپى العاندا، ازيانىڭ 45 ەلىنەن 15 مىڭنان استام سپورتشى 40 سپورت تۇرىنەن 481 مەدال جيىنتىعىنا تالاسىپ جاتىر.

داستان كەنجالين،

استانا

فوتو: تۋريزم جانە سپورت مينيسترلىگى