XIX Azıada: Qazaqstan TOP-10 eldiń qataryna kirdi

Qytaıdyń Hanchjoý qalasynda ótip jatqan Azııa oıyndarynda Qazaqstan quramasy búgingi eki altyn júldeniń jáne kúmis pen qola medaldardyń arqasynda jalpykomandalyq esepte toǵyzynshy orynǵa shyqty.

Top basyna alań ıeleri – Qytaı Halyq Respýblıkasynyń sportshylary ornalasyp otyr. Olar 81 altyn, 45 kúmis jáne 23 qola medal aldy. Ekinshi orynda Ońtústik Koreıanyń ókilderi keledi. Tańǵy shyq eliniń sportshylary 20 altyn, 19 kúmis jáne 35 qola júldeni jeńip aldy. Odan keıingi satyda Japonııa quramasy tur. Kúnshyǵys eliniń ókilderinde 15 altyn, 27 kúmis jáne 24 qola medal bar.

Olardyń ókshesin О́zbekstan sańlaqtary basyp keledi. Bul el alǵash ret óz tarıhynda jalpykomandalyq esepte tórttikke kirdi. Bul memlekettiń ókilderi ázirshe 6 altyn, 10 kúmis jáne 13 qola medaldi jeńip aldy. Sodan keıin úzdik bestikte Úndistan sportshylary bar.  Úndi eli 6 altyn, 8 kúmis jáne 10 qola júldemen besinshi orynǵa shyqty.

Odan keıingi oryndarda Taıland, Gonkong, Iran elderiniń sportshylary keledi. Qazaqstan sportshylary 3 altyn, 3 kúmis jáne 10 qola medalmen toǵyzynshy orynda kóterildi.

Qazaqstannyń ókshesin Indonezııa basyp keledi. Olarda da  3 altyn men 3 kúmis júlde. Biraq eki qola júldesi ǵana bar.

Qazaqstan sportshylarynyń maqsaty – Azıada sońyna deıin úzdik bestikte bolý. Qazir Hanchjoýdaǵy Azıadaǵa elimizden sporttyń 30 túrinen 524 sportshy (262 er jáne 262 áıel) qatysyp jatyr. Onyń 27-si olımpııalyq baǵdarlamaǵa kirse, qalǵan 3-i olımpııalyq emes sport túrleri. Sonymen qatar, Azıadada 8 sport túrinen, atap aıtqanda, boks, sadaq atý, qazirgi bessaıys, júzý, breıkıng, kógaldaǵy hokkeı, tennıs jáne jeńil atletıka boıynsha Parıj Olımpıadasyna  lıenzııalar sarapqa salynady.

Jalpy alǵanda, Azııanyń 45 elinen 15 myńnan astam sportshy 40 sport túrinen 481 medal jıyntyǵyna talasyp jatyr.

Dastan KENJALIN,

ASTANA

FOTO: Týrızm jáne sport mınıstrligi