قازاقستاننان ازياداعا بارعان ەگىز سپورتشىلار كۇمىس جۇلدەگەر بولدى

بۇگىن قىتايدا ءوتىپ جاتقان ازيادادا 10 مەتر قاشىقتىقتان جىلجىمالى نىساناعا وق اتۋ سايىسىندا قازاقستان ايەلدەر قۇراماسى ساپىندا زۋحرا يرنازاروۆا ازيادا چەمپيونى اتاندى. ول سونداي-اق  كوماندالىق سىندا ءوزىنىڭ ەگىزى فاتيما يرنازاروۆامەن جانە الەكساندرا سادۋاقاسوۆامەن بىرگە كۇمىس جۇلدەگەر بولدى.

بيىلعى ازيادادا ءبىرىنشى رەت ەگىز سپورتشىلار قۇرمەت تۇعىرىنا كوتەرىلدى. باسقا ەلدەردەن ەگىز سپورتشىلاردىڭ جارىستارعا قاتىسىپ جاتقانى بىزگە بەلگىسىز. ال زۋحرا مەن فاتيمانىڭ بىرگە دۇرمەكتى دوداعا قاتىسىپ، كۇمىس مەدالدى يەلەنگەنى بۇعان دەيىن بولعان ەمەس.

ەگىز سپورتشىلار 2005 جىلى 2 قاڭتاردا شىمكەنت قالاسىندا تۋعان. زۋحرا 2019 جىلى كاتاردىڭ دوحا قالاسىندا 10 مەتر قاشىقتىقتان جىلجىمالى نىساناعا وق اتۋدان ازيا چەمپيونى اتانعان. ودان كەيىن 2021 جىلى شىمكەنتتە وتكەن ازيا چەمپيوناتىن جەڭىپ العان. ازەربايجاننىڭ باكۋ قالاسىندا وتكەن الەم چەمپيوناتىندا دا باس جۇلدەنى يەلەنگەن. بيىل وڭتۇستىك كورەيانىڭ چانگۆون قالاسىندا  جالاۋى جەلبىرەگەن جاستار اراسىنداعى الەم چەمپيوناتىندا قۇرمەت تۇعىرىنىڭ ەڭ بيىك ساتىسىنان كورىنگەن.

فاتيما دا وسال سپورتشى ەمەس. ول دا جاستار اراسىنداعى الەم چەمپيونى. زۋحرا ەكەۋى كورەيانىڭ چانگۆون قالاسىندا بىرگە قۇرمەت تۇعىرىنا كوتەرىلگەن. 2019 جىلى كاتاردىڭ دوحا قالاسىندا ازيا چەمپيونى اتانعان. 2021 جىلى شىمكەنتتە وتكەن ازيا چەمپيوناتىن جەڭىپ العان. ەكەۋىنىڭ جاتتىقتىرۋشىسى دا ءبىر ادام. ناتاليا يۋنۋسمەتوۆا ەكەۋىن جاستايىنان جاتتىقتىرىپ كەلەدى ەكەن. ەكەۋىنىڭ دە قازاقستان رەسپۋبليكاسىنىڭ حالىقارالىق سپورت شەبەرى دەگەن اتاعى بار.

بۇگىن ەگىز سپورتشىلار الەكساندرا سادۋاقاسوۆامەن بىرگە باسقا سپورتشىلارعا جول اشىپ بەردى. ەسكە سالساق، قىزداردىڭ 10 مەتر قاشىقتىقتان جىلجىمالى نىساناعا وق اتۋ سايىسىنان كەيىن اسەم ورىنباي مەن ەدۋارد ەششەنكو ستەندتىك اتۋ ءتۋرنيرىنىڭ ارالاس جۇپتىق سايىسىندا التىن مەدال جەڭىپ الدى. ەرلەر اراسىنداعى جاعاجاي ۆولەيبولىنان جۇپتىق باسەكەدە دميتري ياكوۆلەۆ پەن سەرگەي بوگاتۋ يران سپورتشىلارى اليرەزا اگاجانيگاساب پەن ابباس پوۋراسگاريدى 2:0 (25:23، 30:28) ەسەبىمەن جەڭىپ، مەدال اكەلدى.

تاەكۆوندوشىلار سمايىل دۇيسەباي مەن جانسەل دەنيز دە ءۇشىنشى ورىننان كورىندى. سپورتتىق گيمناستيكادان ات سناريادىندا ونەر كورسەتكەن 25 جاستاعى ناريمان قۇربانوۆ قولا جۇلدەنى يەلەندى.

قازىر وتانداستارىمىزدا 3 التىن، 3 كۇمىس جانە 11 قولا جۇلدەمەن جالپىكوماندالىق ەسەپتە توعىزىنشى ورنىن ساقتاپ وتىر.

داستان كەنجالين،

استانا