دۇنيەجۇزىلىك جاۋىنگەرلىك ونەر ويىندارى باستالدى

بۇگىن ساۋد ارابياسى كورولدىگىنىڭ استاناسى – ار-ريادتا دۇنيەجۇزىلىك جاۋىنگەرلىك ونەر ويىندارىنىڭ رەسمي اشىلۋى ءوتتى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

Green Halls كەشەنىندە وتكەن اۋقىمدى ءىس-شارادا 80-نەن استام مەملەكەتتىڭ وكىلدەرىنە ءتۇرلى قويىلىمدار، جەكپە-جەك تۇرلەرىنىڭ ەرەكشەلىگى جايلى كورىنىستەر ۇسىنىلدى.

ەلىمىزدە جەكپە-جەك تۇرلەرى ءتيىستى دەڭگەيدە دامىپ جاتىر. ونىڭ ۇستىنە حالىقتىڭ باسىم بولىگى اتالعان سپورتتى تۇراقتى باقىلاپ وتىرادى. بوكس، دزيۋدو، كاراتە، كيكبوكسينگ پەن ارمرەستلينگتەن ءىرى جارىستاردا ۇلتتىق قۇرامامىز ۇزدىك وندىقتا جۇرەدى. ساۋد ارابياسىنداعى بۇل كەشەندى جارىسقا دەلەگاتسيا جاقسى دايىندىقپەن كەلدى. كەي سپورت تۇرلەرىنەن الەم چەمپيوناتىمەن قاتار كەلگەنىنە قاراماستان، جارىسقا قابىلەتتى كوماندا جاساقتادىق، – دەدى تسم سپورت جانە دەنە شىنىقتىرۋ ىستەرى كوميتەتىنىڭ مامانى كەلبەت نۇرعازينا.

بۇل ويىندارعا قازاقستان سپورتتىڭ 9 تۇرىنەن 53 اتلەتتەن دەلەگاتسيا جاساقتاپ الىپ كەلدى. الداعى كۇندەرى العاشقى جۇلدە جيىنتىعىن سامبوشىلار ساراپقا سالادى. قازىر بوزكىلەم شەبەرلەرى سالماق ولشەپ، ەرتەڭگى جۇلدە جولىنداعى جەكپە-جەكتەرىنە دايىندالىپ جاتىر.

الەم چەمپيوناتىنا از ۋاقىت قالدى. سوعان قاراماستان وسىندا كوپتەگەن سالماقتا مىقتى سپورتشىلاردى الىپ كەلدىك. ەرلەر مەن ايەلدەر ءۇشىن دە جەرەبە جولداس بولعان جوق. دەگەنمەن جاقسى ناتيجە كورسەتۋگە شاما-شارقىمىز جەتەدى. اتاپ ايتار بولسام، جاۋىنگەرلىك سامبودا ادىلبەك سەيىسوۆ (64 كگ)، اسقار ابدوللا (98 كگ)، ال سپورتتىق سامبودا ساعىنىش ءالىپباي (71 كگ)، تەمىرلان كولباي ەلگە جۇلدەمەن ورالادى دەگەن سەنىمدەمىز، – دەدى سامبودان ۇلتتىق قۇرامانىڭ باس جاتتىقتىرۋشىسى ءبىرجان يماحانوۆ سپورتتى دامىتۋ ديرەكتسياسىنىڭ ءباسپاسوز قىزمەتىنە بەرگەن سۇحباتىندا.

جالپى ار-ريادتاعى ويىندار باعدارلاماسىندا 16 سپورت ءتۇرى بار. ونىڭ ىشىندە دزيۋدو، تاەكۆوندو، كۇرەس، سەمسەرلەسۋ مەن بوكس وليمپيادا باعدارلاماسىنا كىرەدى. سونداي-اق ايكيدو، ارمرەستلينگ، دجيۋ-دجيتسۋ، كاراتە، كەندو، كيكبوكسينگ، تاي بوكسى (مۋاي-تاي)، سامبو، ساۆات (فرانتسۋز بوكسى)، سۋمو مەن ۋشۋ بار.

بۇل كەشەندى جارىستىڭ (World Combat Games) تاريحى 2010 جىلدان باستاۋ الادى. العاش رەت قىتايدىڭ استاناسى – بەيجىڭدە 27 تامىز بەن 4 قىركۇيەك ارالىعىندا وتكەن ويىنداردا سپورتتىڭ 13 تۇرىنەن ۇزدىكتەر انىقتالعان. قازاقستان دەلەگاتسياسى 9 سپورت تۇرىنەن 45 اتلەت اپارىپ، 1 التىن، 2 كۇمىس، 3 قولا مەدالگە يە بولعان. سول كەزدە التىن مەدالدى  ەرلان تىلەۋىمبەتوۆ (69 كگ، دجيۋ-دجيتسۋ)، كۇمىس جۇلدەنى نۇرلان تىلەۋىمبەتوۆ (77 كگ، دجيۋ-دجيتسۋ)، ارمان سانسەربين (68 كگ، سامبو) مەن ارمان شىلمانوۆ (+80 كگ، تاەكۆوندو)، قولا مەدالدى ازامات نۇرپەيىسوۆ (75 كگ، كيكبوكسينگ (فۋلكونتاكت)، نۇربولات سەڭگىروۆ (82 كگ، مۋايتاي) پەن جۇماگەلدى جەتپىسباەۆ (70 كگ، پانكراتيون) جەڭىپ الدى.

ودان كەيىن اراعا ءۇش جىل سالىپ كەلەسى ويىندار رەسەيدىڭ سانكت-پەتەربۋرگ قالاسىندا بولدى. وندا سپورتتىڭ 15  تۇرىنەن 135 جۇلدە جيىنتىعىنىڭ يەگەرلەرى انىقتالدى. ەلدەن بارعان 5 سپورت تۇرىنەن 20 جەكپە-جەك شەبەرى ەكى قولا جۇلدەنى يەلەندى. بۇل جۇلدەگە تىلەۋعابىل امانتوريەۆ (62 كگ، دجيۋ-دجيتسۋ) پەن جانسەرىك ءامىرجانوۆ (67 كگ، مۋايتاي) يە بولدى.

سوسىن ءبىرشاما ۋاقىت بويى كەزەكتى دودانى ۇيىمداستىرۋدىڭ رەتى تۇسپەدى. جان-جاقتى كەلىسسوزدەردەن كەيىن تايبەيگە سول مۇمكىندىك بەرىلگەنىمەن، ول دا كەيىنگە شەگەرىلدى. ال IV باسەكە 2021 جىلى قازاقستاننىڭ باس قالاسى استانادا وتۋگە ءتيىس بولعان. الايدا كوروناۆيرۋس پاندەمياسىنا بايلانىستى الەم اتلەتتەرى بۇل سىندا باق سىناي العان جوق.

بەسىنشى جارىستى ۇيىمداستىرۋدى بيىل ساۋد ارابياسىنىڭ كورولدىگى ءوز موينىنا الدى.

وسى ۋاقىتقا دەيىن دۇنيەجۇزىلىك جاۋىنگەرلىك ونەر ويىندارىندا 77 مەملەكەتتىڭ سپورتشىسى جۇلدە العان. قازاقستان جالپى ەسەپتە 1 التىن، 3 كۇمىس جانە 5 قولا مەدالمەن 37-ورىندى گونكونگ جانە سەربيامەن ءبولىسىپ تۇر.

فوتو: تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى