«جەڭىس» فۋتبول كلۋبىنا جاڭا باس جاتتتىقتىرۋشى كەلدى

استانا قالاسىنىڭ «جەڭىس» فۋتبول كلۋبىنا گرۋزيا ۇلتتىق قۇراما كومانداسىنىڭ بۇرىنعى ويىنشىسى لەۆان كورگاليدزە باس جاتتىقتىرۋشى بولىپ تاعايىندالدى.

لەۆان كورگاليدزە 1980 جىلى تۋعان. ول –  كەڭەس وداعى جانە گرۋزيانىڭ چەمپيوناتىندا ءتبيليسيدىڭ «دينامو»، ءلانچحۋتيدىڭ «گۋريا» مەن باسقا دا كوپتەگەن كلۋبتارىندا ويناعان ايگىلى فۋتبولشى وتار كورگاليدزەنىڭ ۇلى. لەۆاننىڭ ءوزى ءتبيليسيدىڭ «دينامو»، ءلانچحۋتيدىڭ «گۋريا»، كۋتايسيدىڭ «تورپەدو» جانە باسقا دا گرۋزيا مەن شەتەل كوماندالارىندا شابۋىل شەبىندە ويناعان. جاتتىقتىرۋشى بولىپ ەكى كوماندادا جۇمىس ىستەگەن. ونىڭ ءبىرى – تبيليسيدىڭ «سابۋرتالو» كلۋبى بولسا، ەكىنشىسى وسى قالانىڭ «لوكوموتيۆ» كومانداسى.

گرۋزيا مامانى جاتتىقتىرۋشىلىق مانسابىن 2017 جىلى «سابۋرتالو» كلۋبىنىڭ جاستار قۇراماسىنىڭ جاتتىقتىرۋشىسى رەتىندە باستادى. 2019 جىلى ول تۋرنير كەستەسىنىڭ سوڭىندا تۇرعان ءتبيليسيدىڭ «لوكوموتيۆ» كلۋبىنا اۋىسىپ، بۇل كوماندانى گرۋزيا كۋبوگىنىڭ فينالىنا شىعارعان. ونىڭ جەتەكشىلىگىمەن كوماندا  چەمپيوناتتى ءتورتىنشى ورىنمەن اياقتاپ، ەۋروپا تۋرنيرلەرىنە قاتىسۋعا جولداما الدى.

كەلەسى ماۋسىمدا ول كوماندانى ەۋروپا ليگاسىندا دەبيۋت جاساپ، ءۇشىنشى ىرىكتەۋ تۋرنيرىنە شىعاردى، – دەپ حابارلادى «جەڭىس» فۋتبول كلۋبى.

كلۋبتىڭ جاڭا باس جاتتىقتىرۋشىسىمەن كەزدەسۋ 5 جەلتوقسانعا جوسپارلانعان. سول كەزدە كوماندا تۇركياعا العاشقى وقۋ-جاتتىعۋ جيىنىن وتكىزۋگە بارادى.

ەندى استانادا قازاقستان پرەمەر-ليگاسىندا وينايتىن ەكى كلۋب بولادى. ونىڭ ءبىرى – بيىلعى ماۋسىمدا ءبىرىنشى ليگادان كەلگەن «جەڭىس» بولسا، ەكىنشىسى – 2010 جىلى قۇرىلعان «استانا» كلۋبى.

«جەڭىس» «استانا» دەگەن اتپەن سوڭعى رەت جوعارعى ليگادا 2008 جىلى وينادى. بۇل كلۋبتىڭ اتى بىرنەشە رەت وزگەردى. 2006 جىلى «استانا» بولىپ وزگەرىپ، 2009 جىلى «لوكوموتيۆ» بولىپ قۇرىلدى.

2010 جىلى «لوكوموتيۆ» جىلدىڭ سوڭىندا اتىن «استانا» بولىپ وزگەرتتى. ال بۇرىنعى «جەڭىس» 2009 جىلى ءبىرىنشى ليگادا «نامىس» دەگەن اتپەن ويناپ، 2010 جىلى ونىڭ اتى «استانا» بولىپ وزگەردى. ءسويتىپ، ءبىرىنشى ليگاداعى «استانا»، ياعني «جەڭىس» كلۋبىنىڭ جالعاسى بولىپ ەسەپتەلەتىن كلۋب ءبىر قالادا ەكى «استانا» كومانداسى دەپ نارازىلىق ءبىلدىردى. ودان كەيىن ءبىرىنشى ليگاداعى «استانا» اتىن «استانا-1964» كلۋبى دەپ وزگەرتتى.  ال «لوكوموتيۆتىڭ» ورنىنا قۇرىلعان «استانا» جوعارعى ليگادا وينادى.

ءبىرىنشى ليگاداعى «استانا-1964» كومانداسى 1964 جىلى تسەلينوگرادتا قۇرىلعان. سول كەزدە «دينامو» كلۋبى قۇرىلدى. ول كوماندا 1975 جىلدان باستاپ «تسەليننيك» بولىپ اتالدى. 1994-1995 جىلدارى «تسەسنا» بولدى. 1996 جىلى قايتادان «تسەليننيك» بولىپ اتىن وزگەرتتى. 1997 جىلى جىلدىڭ ورتاسىندا «استانا» بولىپ قۇرىلدى. 1999 جىلى «جەڭىس» كومانداسى بولىپ جاسىل الاڭعا شىقتى.

كوماندا كەزىندە كسرو-نىڭ ەكىنشى ليگاسىندا ويناعان. قازاق كسر كۋبوگىن 1968 جانە 1986 جىلدارى جەڭىپ العان. 1973 پەن 1985 جىلدارى قازاق كسر كۋبوگىنىڭ ءفيناليسى بولعان.

بۇل كلۋبتا 1955 – 1960 جىلدارى قازاق كسر-ءى جوعارعى كەڭەسى تورالقاسىنىڭ توراعاسى، 1960 – 1961 جىلدارى قازاق كسر-ءى مينيسترلەر كەڭەسىنىڭ توراعاسى بولعان مەملەكەت جانە قوعام قايراتكەرى جۇمابەك تاشەنەۆتىڭ نەمەرە ءىنىسى، اقمولا وبلىسىنىڭ استراحان اۋدانىنىڭ تۋماسى ءسالىم تاشەنەۆ ويناعان. ول 1980 – 1996 جىلدارى «تسەليننيك» كومانداسىندا دوپ تەپكەن. كوزكورگەندەردىڭ ايتۋىنشا، ول كلۋبتىڭ اڭىزى ەدى.

ءسالىم تاشەنەۆ 1956 جىلى تۋعان. 2007 جىلى قايتىس بولدى.

2014 جىلى «استانا – 1964» دەپ اتالعان كلۋب تاراتىلدى. كلۋب 2021 جىلى قايتا جانداندى.

2003 جىلى «جەڭىستە» قازاقستان ۇلتتىق قۇراما كومانداسىنىڭ باس جاتتىقتىرۋشىسى ماگومەد اديەۆ ويناعان.

«جەڭىس» ءۇش رەت 2000، 2001 جانە 2006 جىلى قازاقستان چەمپيونى بولعان. ال «استانا» جەتى رەت ەل چەمپيونى اتانعان. بۇل كوماندا چەمپيوناتتى 2014 پەن 2019 جىلدارى جانە 2022 جىلى جەڭىپ الدى.

داستان كەنجالين،

استانا