ۋەفا «توبىلدى» ەۋروپا جارىستارىنا قاتىستىرماۋى مۇمكىن (ۆيدەو)

قوستانايدىڭ «توبىل» فۋتبول كلۋبىندا پروبلەما بولۋى مۇمكىن. بۇل تۋرالى كلۋبتىڭ ەكس-ديرەكتورى اندرەي كانچەلسكيس ايتتى. ول جاقىندا كلۋبتىڭ تەڭ توراعاسىنىڭ شەشىمىمەن وتستاۆكاعا جىبەرىلگەن بولاتىن.

كانچەلسكيس – رەسەيدىڭ ازاماتى. ول كلۋبتىڭ ديرەكتورى بولىپ 4 اي جۇمىس ىستەدى. ونىڭ كلۋبپەن كەلىسىمى بيىلعى جىلدىڭ سوڭىنا دەيىن ەسەپتەلگەن ەدى. ەندى ول «توبىل» كلۋبىنىڭ ءباسپاسوز قىزمەتى حابارلاعانداي، 23 قاراشادا رەسمي تۇردە وتستاۆكاعا كەتتى. وسىعان بايلانىستى كانچەلسكيس باسشىلىقتىڭ شەشىمىمەن كەلىسپەيتىنىن ايتىپ، تاعى دا مالىمدەمە جاسادى. ونىڭ ايتۋىنشا، بۇرىن الاياقتىقپەن اينالىسقان ءالىمجان قالدياروۆقا قاتىستى جاڭا قىلمىستىق ىستەر قوزعالادى.

«توبىل» كلۋبىندا نە بولىپ جاتقانىن ءبىلىپ وتىرعان شىعارسىزدار. مەن كلۋبتاعى جاعدايدى تاعى دا تۇسىندىرگىم كەلەدى. كلۋبقا جاڭا ينۆەستورلاردىڭ كەلۋىمەن تۇسىنىكسىز جاعداي بولا باستادى. قازىر كلۋبتا بالالار مەن جاسوسپىرىمدەر فۋتبولىنىڭ قالاي ناسيحاتتالىپ، كومانداداعى ويىنشىلاردىڭ ۇلتتىق قۇرامادا قالاي ويناپ جاتقانىن كورىپ وتىرسىزدار. ال، كلۋبتىڭ ىشكى اسحاناسىنداعى جاعداي سىرت كوزگە جاقسى كورىنگەنىمەن مۇلدەم باسقاشا. وسى جاعداي جانكۇيەرلەردى دە مەنى دە الاڭداتادى، – دەدى ول.

وسى رەتتە ول كلۋبتىڭ باسشىلىعىنا بۇرىن الاياقتىقپەن اينالىسقان ادامدار كەلگەنىن، سولاردىڭ كەسىرىنەن كوماندادا پروبلەمالار باس قىلتيتا باستاعانىن ايتتى.

مەن ولاردىڭ فۋتبول كلۋبىنا قالاي كەلگەنىن تۇسىنبەيمىن. ولار فۋتبولدان باسقا نارسەلەرمەن اينالىسۋ ءۇشىن كەلدى. ال ءبىزدىڭ ماقساتىمىز – فۋتبولمەن اينالىسۋ، جاسوسپىرىمدەر فۋتبولىن دامىتۋ جانە باسقا دا فۋتبولعا قاتىستى دۇنيەنى دامىتۋ. قازىر كلۋبتا جۇرگەن وسىنداي الاياقتارمەن بولاشاقتا «توبىلدا» پروبلەما بولۋى مۇمكىن.

بىرىنشىدەن، بۇل الاياقتارعا قاتىستى فيفا-دان سۇراۋ ءتۇستى. وعان جاۋاپ بەرىلدى. مىنە، جاۋاپ حات. مەنىڭ ويىمشا، وتە اۋىر پروتسەستەر بولادى. وسى الاياقتاردىڭ كەسىرىنەن «توبىلدىڭ» زارداپ شەككەنىن قالاماس ەدىم. سوندىقتان وسىنى بارلىعى ءتۇسىنىپ، باسشى ورگاندار نازار اۋدارسا دەيمىن. نازارلارىڭىزعا كوپ راحمەت!، – دەدى كانچەلسكيس Instagram پاراقشاسىندا.

كانچەلسكيستىڭ سوزىنەن بەلگىلى بولعانداي، ەگەر «توبىلدىڭ» اينالاسىنداعى ۋ-شۋ اڭگىمە باسىلماي، تاراپتار كەلىسىمگە كەلمەسە كلۋب كەلەسى جىلى چەمپيوندار ليگاسىنا دا قاتىسپاۋى مۇمكىن. ونى ۋەفا قاتىستىرماۋى ىقتيمال.

ول وتكەن اپتادا قىزمەتتەن ەرىكسىز كەتۋىنە بايلانىستى فيفا مەن ۋەفا-عا ارىز جازاتىنىن ايتقان بولاتىن.

29 قاراشادا جۇمىسقا كەلگەندە دۇرىستاپ سويلەسەمىز. ەگەر جاعداي باسقاشا بولسا، وندا مەن فيفا مەن ۋەفا-عا ارىز جازامىن. سوندا كىمنىڭ كىم ەكەنىن كورەمىز، – دەدى ول.

بۇگىن – 29 قاراشا.

داستان كەنجالين،

استانا

 

View this post on Instagram

 

A post shared by Andrei Kanchelskis (@andrei_kanchelskis)