ÝEFA «Tobyldy» Eýropa jarystaryna qatystyrmaýy múmkin (VIDEO)

Qostanaıdyń «Tobyl» fýtbol klýbynda problema bolýy múmkin. Bul týraly klýbtyń eks-dırektory Andreı Kanchelskıs aıtty. Ol jaqynda klýbtyń teń tóraǵasynyń sheshimimen otstavkaǵa jiberilgen bolatyn.

Kanchelskıs – Reseıdiń azamaty. Ol klýbtyń dırektory bolyp 4 aı jumys istedi. Onyń klýbpen kelisimi bıylǵy jyldyń sońyna deıin eseptelgen edi. Endi ol «Tobyl» klýbynyń baspasóz qyzmeti habarlaǵandaı, 23 qarashada resmı túrde otstavkaǵa ketti. Osyǵan baılanysty Kanchelskıs basshylyqtyń sheshimimen kelispeıtinin aıtyp, taǵy da málimdeme jasady. Onyń aıtýynsha, buryn alaıaqtyqpen aınalysqan Álimjan Qaldııarovqa qatysty jańa qylmystyq ister qozǵalady.

«Tobyl» klýbynda ne bolyp jatqanyn bilip otyrǵan shyǵarsyzdar. Men klýbtaǵy jaǵdaıdy taǵy da túsindirgim keledi. Klýbqa jańa ınvestorlardyń kelýimen túsiniksiz jaǵdaı bola bastady. Qazir klýbta balalar men jasóspirimder fýtbolynyń qalaı nasıhattalyp, komandadaǵy oıynshylardyń ulttyq quramada qalaı oınap jatqanyn kórip otyrsyzdar. Al, klýbtyń ishki ashanasyndaǵy jaǵdaı syrt kózge jaqsy kóringenimen múldem basqasha. Osy jaǵdaı jankúıerlerdi de meni de alańdatady, – dedi ol.

Osy rette ol klýbtyń basshylyǵyna buryn alaıaqtyqpen aınalysqan adamdar kelgenin, solardyń kesirinen komandada problemalar bas qyltıta bastaǵanyn aıtty.

Men olardyń fýtbol klýbyna qalaı kelgenin túsinbeımin. Olar fýtboldan basqa nárselermen aınalysý úshin keldi. Al bizdiń maqsatymyz – fýtbolmen aınalysý, jasóspirimder fýtbolyn damytý jáne basqa da fýtbolǵa qatysty dúnıeni damytý. Qazir klýbta júrgen osyndaı alaıaqtarmen bolashaqta «Tobylda» problema bolýy múmkin.

Birinshiden, bul alaıaqtarǵa qatysty FIFA-dan suraý tústi. Oǵan jaýap berildi. Mine, jaýap hat. Meniń oıymsha, óte aýyr proester bolady. Osy alaıaqtardyń kesirinen «Tobyldyń» zardap shekkenin qalamas edim. Sondyqtan osyny barlyǵy túsinip, basshy organdar nazar aýdarsa deımin. Nazarlaryńyzǵa kóp rahmet!, – dedi Kanchelskıs Instagram paraqshasynda.

Kanchelskıstiń sózinen belgili bolǵandaı, eger «Tobyldyń» aınalasyndaǵy ý-shý áńgime basylmaı, taraptar kelisimge kelmese klýb kelesi jyly Chempıondar lıgasyna da qatyspaýy múmkin. Ony ÝEFA qatystyrmaýy yqtımal.

Ol ótken aptada qyzmetten eriksiz ketýine baılanysty FIFA men ÝEFA-ǵa aryz jazatynyn aıtqan bolatyn.

29 qarashada jumysqa kelgende durystap sóılesemiz. Eger jaǵdaı basqasha bolsa, onda men FIFA men ÝEFA-ǵa aryz jazamyn. Sonda kimniń kim ekenin kóremiz, – dedi ol.

Búgin – 29 qarasha.

Dastan KENJALIN,

ASTANA

 

View this post on Instagram

 

A post shared by Andrei Kanchelskis (@andrei_kanchelskis)