قازاقستان سپورتشىلارى جاسوسپىرىمدەر وليمپياداسىنا قاتىسادى

سپورتشىلار كەلەسى جىلدىڭ 19 قاڭتارى مەن 1 اقپانى ارالىعىندا وڭتۇستىك كورەيانىڭ كانۆوندو پروۆينتسياسىنداعى كاننىن قالاسىندا جالاۋى جەلبىرەيتىن IV قىسقى جاسوسپىرىمدەر وليمپياداسىنا قاتىسادى.

وسىعان بايلانىستى تۋريزم جانە سپورت مينيسترلىگەندە ۆەدومستۆو باسشىسى ەرمەك مارجىقپاەۆتىڭ قاتىسۋىمەن وليمپياداعا باراتىن سپورتشىلاردىڭ دايىندىعى بويىنشا كەڭەيتىلگەن وتىرىس بولدى.

جيىندا ەرمەك مارجىقپاەۆ سپورت جانە دەنە شىنىقتىرۋ ىستەرى كوميتەتىنە ۇلتتىق وليمپيادا كوميتەتى، سپورتتى دامىتۋ ديرەكتسياسى جانە وليمپيادالىق دايىندىق ورتالىعىمەن تىزە قوسىپ، بىرقاتار ماسەلەنى شەشۋدى تاپسىردى. اتاپ ايتقاندا، ويىندارعا قاتىساتىن سپورتتىق دەلەگاتسيانىڭ ساپالى قۇرامىن قالىپتاستىرۋ، ۇيىمداستىرۋ كوميتەتىنىڭ تالاپتارىنا سايكەس سپورتتىق جۇكتەمەنىڭ تىزبەسىن پىسىقتاۋ، دەلەگاتسيا مۇشەلەرىن جابدىقتاۋ كەستەسىن بەكىتۋ، سپورتشىلاردىڭ دايىندىق بارىسى مەن تۋ ۇستاۋشىلاردى بەكىتۋ جانە تاعى باسقا ماڭىزدى ماسەلەلەردى شەشۋ كەرەكتىگىن ايتتى.

كانۆوندوداعى IV قىسقى جاسوسپىرىمدەر وليمپياداسىنا قازاقستان جاسوسپىرىمدەر قۇراماسىنىڭ قورجىنىندا ازىرگە سپورتتىڭ 5 تۇرىنەن (بياتلون، كونكيمەن جۇگىرۋ، شورت-ترەك، كەرلينگ، شايبالى حوككەي) 17 جولداما بار. ال جالپى وليمپياداعا جەر-جاھاننىڭ 70 ەلىنەن 1 800 (900 ۇل، 900 قىز) سپورتشى قاتىسادى دەپ جوسپارلانىپ وتىر. سپورتتىڭ 7 تۇرىنەن 15 ديستسيپلينا بويىنشا 81 مەدال جيىنتىعى ساراپقا سالىنادى.

IV قىسقى جاسوسپىرىمدەر وليمپياداسىنىڭ اشىلۋ سالتاناتى 2024 جىلدىڭ 19 قاڭتارىندا كاننىنداعى Gangneuung Oval سپورت كەشەنىندە وتسە، ويىنداردىڭ جابىلۋ سالتاناتى 2024 جىلدىڭ 1 اقپانىندا Gangneung Olympic Park سپورت كەشەنىندە ۇيىمداستىرىلادى دەپ جوسپارلانعان.

داستان كەنجالين،

استانا