سپورتتىق اتۋ فەدەراتسياسى وليمپياداعا دايىندىقتى تانىستىردى

تۋريزم جانە سپورت ءمينيسترى ەرمەك مارجىقپاەۆ سپورتتىق اتۋ فەدەراتسياسىنىڭ باسشىلارىمەن جانە جاتتىقتىرۋشىلار شتابىمەن كەزدەستى، دەپ حابارلادى ۆەدومستۆو.

جيىندا وق اتۋ جانە ستەندتىك اتۋ وكىلدەرى سپورتشىلارىمىزدىڭ سوڭعى ءىرى حالىقارالىق تۋرنيرلەردەگى جارىسىن قورىتىندىلاپ، پاريج وليمپياداسىنا دايىندىق جوسپارىن تانىستىردى.

قىتايداعى ازيا ويىندارىندا قازاقستان قۇراماسى ستەندتىك اتۋ بويىنشا – 2 التىن جانە 3 قولا، وق اتۋ بويىنشا – 1 التىن، 2 كۇمىس جانە 2 قولا مەدال جەڭىپ الدى. سارى قۇرلىق دوداسىندا ز.يرنازاروۆا، كوماندالىق سكيت ميكستتە ءا.ورىنباي مەن ە.ەششەنكو جانە ايەلدەر اراسىنداعى كوماندالىق سكيتتە ز.كراۆچەنكو، ءا.ورىنباي، و.پانارينا توپ جاردى.

وق اتۋ جانە ستەندتىك اتۋ – مەدالدار ەڭ كوپ ساراپقا سالىناتىن سپورت تۇرلەرىنىڭ ءبىرى. ۇلتتىق قۇرامانىڭ كەيىنگى جىلدارداعى ناتيجەلەرى ەلىمىزدە سپورتتىق اتۋدىڭ قارقىندى دامىپ كەلە جاتقانىن كورسەتەدى. مەرگەندەردىڭ ازيا ويىندارىنداعى جەتىستىگى بارشامىزدى قۋانتتى. ءونىمدى جۇمىس ىستەلگەنى كورىنىپ تۇر. ەڭ باستىسى – سىزدەر بۇكىل ەلدىڭ ءۇمىتىن اقتادىڭىزدار. الدا ليتسەنزيالىق جارىستار مەن 2024 جىلعى جازعى وليمپيادا كۇتىپ تۇر. وسى سپورت ءتۇرىن سەرىك ەتكەن كوماندا كوشباسشىلارى ىرىكتەۋ سايىستارىنان ءساتتى ءوتىپ، تورتجىلدىقتىڭ باستى دوداسىندا لايىقتى ونەر كورسەتەدى دەپ ۇمىتتەنەمىز، — دەدى ەرمەك مارجىقپاەۆ.

قازىرگى ۋاقىتتا قازاقستاننىڭ سپورتتىق اتۋ قۇراماسى پاريج وليمپياداسىنىڭ 3 ليتسەنزيانى يەلەنىپ وتىر. 2024 جىلعا 2 ستەندتىك جانە 2 وق اتۋ بويىنشا 4 ليتسەنزيالىق تۋرنير جوسپارلانعان. دەمەك، جولدامالار سانىن تاعى دا كوبەيتۋگە مۇمكىندىك بار.

كەزدەسۋ سوڭىندا تۋريزم جانە سپورت ءمينيسترى قۇرامانىڭ جاتتىقتىرۋشىلار شتابىنا جەكە العىسىن ءبىلدىرىپ، وق اتۋدان باس جاتتىقتىرۋشى ولگا دوۆگۋنعا مەملەكەت باسشىسىنىڭ اتىنان ەستەلىك سىيلىق تابىس ەتتى.