رىباكينا جاڭا جىلدى جەڭىسپەن باستادى

تەننيسشى ەلەنا رىباكينا بيىلعى جىلدى جەڭىسپەن باستادى. ول اۋستراليانىڭ بريسبەن قالاسىندا ءوتىپ جاتقان Brisbane International WTA 500 تۋرنيرىندە جارىستى ەكىنشى اينالىمنان باستاپ، كورت يەسى وليۆيا گادەكيدى جەڭدى، دەپ حابارلادى قازاقستان تەننيس فەدەراتسياسى.

ءبىرىنشى پارتيادا رىباكينا برەيك جاساپ،  6:4 ەسەبىمەن اياقتاسا، ەكىنشى سەتتە قارسىلاسىنان 6:1 ەسەبىمەن ايلاسىن اسىردى.

بۇل ماتچ ءبىر ساعاتتان استام ۋاقىتقا سوزىلدى. وسى ۋاقىتتا رىباكينا 4 ەيس جاساپ، 5 برەيك-پوينتتىڭ ۇشەۋىن پايدالاندى.

ءتۋرنيردىڭ جۇلدە قورى — 1، 736 763 دوللار. ەندى رىباكينا 1/8 فينالدا شيرەك فينالعا شىعۋ ءۇشىن الەمنىڭ 30-راكەتكاسى، بەلگيالىق ەليزا مەرتەنسپەن نەمەسە رەيتينگىدە 44-ورىنداعى امەريكالىق سلوان ستيۆەنسپەن كەزدەسەدى.

رىباكينادان باسقا قازاقستاننىڭ جۇپتىق سىنداعى ءبىرىنشى، الەمنىڭ 54-راكەتكاسى اننا دانيلينا جاڭا زەلانديانىڭ وكلەند قالاسىندا ءوتىپ جاتقان WTA 250 ءتۋرنيرىنىڭ جارتىلاي فينالىنا شىقتى.

ول جارىستىڭ ەكىنشى راكەتكاسى بولىپ تىركەلىپ، سلوۆاكيالىق ۆيكتوريا گرۋنچاكوۆامەن بىرگە شيرەك فينالدا قىتايلىقتار يۋان يۋەمەن جانە سيۋ ۆانمەن وينادى. ءبىرىنشى پارتيادا قازاقستاندىق-سلوۆاكيالىق جۇپ برەيك جاساپ، سول باسىمدىعىن ساقتاپ قالدى. ەسەپ — 6:4.

ەكىنشى سەتتە قىتايلىق دۋەت 3:1 ەسەبىمەن العا شىققانىمەن، ماسەلە تاي-برەيكتە شەشىلدى. وندا دانيلينا مەن گرۋنچاكوۆا 7:6 (8:6) ەسەبىمەن جەڭدى. ەندى اننا دانيلينا مەن ۆيكتوريا گرۋنچاكوۆانىڭ جارتىلاي فينالداعى قارسىلاستارى كەيىن انىقتالادى.

جىبەك قۇلامباەۆا جۇپتىق سىندا تايلاندتىڭ نونتحابۋري قالاسىندا جالاۋىن كوتەرگەن ITF ءتۋرنيرىنىڭ شيرەك فينالىنا شىقتى.

جارىستىڭ ءبىرىنشى راكەتكاسى بولىپ تىركەلگەن ج.قۇلامباەۆا گرەكيالىق ساپفو ساكەللاريديمەن بىرگە يندونەزيالىق بەاتريس گۋمۋليا مەن جاپونيالىق رينا سايگودان 6:4، 6:3 ەسەبىمەن باسىم ءتۇستى.

جىبەك قۇلامباەۆا مەن ساپفو ساكەللاريدي دۋەتى جارتىلاي فينالعا شىعۋ ءۇشىن پولشا وكىلى مايا حۆالينسكا مەن جاپونيالىق يۋكي نايتومەن كەزدەسەدى.