Rybakına jańa jyldy jeńispen bastady

Tennısshi Elena Rybakına bıylǵy jyldy jeńispen bastady. Ol Aýstralııanyń Brısben qalasynda ótip jatqan Brisbane International WTA 500 týrnırinde jarysty ekinshi aınalymnan bastap, kort ıesi Olıvııa Gadekıdi jeńdi, dep habarlady Qazaqstan tennıs federaııasy.

Birinshi partııada Rybakına breık jasap,  6:4 esebimen aıaqtasa, ekinshi sette qarsylasynan 6:1 esebimen aılasyn asyrdy.

Bul match bir saǵattan astam ýaqytqa sozyldy. Osy ýaqytta Rybakına 4 eıs jasap, 5 breık-poınttyń úsheýin paıdalandy.

Týrnırdiń júlde qory — 1, 736 763 dollar. Endi Rybakına 1/8 fınalda shırek fınalǵa shyǵý úshin álemniń 30-raketkasy, belgııalyq Elıza Mertenspen nemese reıtıngide 44-oryndaǵy amerıkalyq Sloan Stıvenspen kezdesedi.

Rybakınadan basqa Qazaqstannyń juptyq syndaǵy birinshi, álemniń 54-raketkasy Anna Danılına Jańa Zelandııanyń Oklend qalasynda ótip jatqan WTA 250 týrnıriniń jartylaı fınalyna shyqty.

Ol jarystyń ekinshi raketkasy bolyp tirkelip, slovakııalyq Vıktorııa Grýnchakovamen birge shırek fınalda qytaılyqtar Iýan Iýemen jáne Sıý Vanmen oınady. Birinshi partııada qazaqstandyq-slovakııalyq jup breık jasap, sol basymdyǵyn saqtap qaldy. Esep — 6:4.

Ekinshi sette qytaılyq dýet 3:1 esebimen alǵa shyqqanymen, másele taı-breıkte sheshildi. Onda Danılına men Grýnchakova 7:6 (8:6) esebimen jeńdi. Endi Anna Danılına men Vıktorııa Grýnchakovanyń jartylaı fınaldaǵy qarsylastary keıin anyqtalady.

Jibek Qulambaeva juptyq synda Taılandtyń Nonthabýrı qalasynda jalaýyn kótergen ITF týrnıriniń shırek fınalyna shyqty.

Jarystyń birinshi raketkasy bolyp tirkelgen J.Qulambaeva grekııalyq Sapfo Sakellarıdımen birge ındonezııalyq Beatrıs Gýmýlıa men japonııalyq Rına Saıgodan 6:4, 6:3 esebimen basym tústi.

Jibek Qulambaeva men Sapfo Sakellarıdı dýeti jartylaı fınalǵa shyǵý úshin Polsha ókili Maııa Hvalınska men japonııalyq Iýkı Naıtomen kezdesedi.