بوكس فەدەراتسياسىنىڭ جاڭا باسشىسى سايلاندى

بۇگىن استانادا قازاقستان بوكس فەدەراتسياسىنىڭ جىلدىق ءداستۇرلى جيىنى بولدى. جيىندا فەدەراتسيانىڭ جاڭا پرەزيدەنتى بولىپ شاحمۇرات ءمۇتالىپ سايلاندى، دەپ حابارلادى فەدەراتسيانىڭ ءباسپاسوز قىزمەتى.

ول بۇل قىزمەتتە كەڭەس راقىشەۆتى الماستىردى. جيىندا قاۋىمداستىقتىڭ بۇرىنعى باسشىسى كەڭەس راقىشەۆ ءوزى باسشىلىق ەتكەن ءتورت جىلدا اتقارىلعان جۇمىستار بويىنشا ەسەپ بەرىپ، ارىپتەستەرىنە، بوكس جانكۇيەرلەرىنە العىسىن ءبىلدىردى.

فەدەراتسيانىڭ جاڭادان سايلانعان پرەزيدەنتى شاحمۇرات ءمۇتالىپ بۇل قىزمەت وزىنە ارتىلعان زور سەنىم ءارى ۇلكەن جاۋاپكەرشىلىك ەكەنىن ايتتى. سونداي-اق، داۋىس بەرۋشىلەرگە العىسىن ءبىلدىرىپ، قازاق بوكسىن دامىتۋ، الەمدىك دەڭگەيدەگى بەدەلىن كوتەرۋ جولىندا بار كۇش-جىگەرىمەن قىزمەت ەتەتىنىن جەتكىزدى.

ماعان جۇكتەلگەن جاۋاپكەرشىلىكتى سەزىنە وتىرىپ، قازاقستان بوكسىن ءارى قاراي دامىتۋعا، سپورتشىلارىمىزعا جان-جاقتى قولداۋ كورسەتىپ، ولاردىڭ مۇددەسىن قورعاۋعا، قبف ءرولىن ەل ىشىندە جانە حالىقارالىق دەڭگەيدە ارتتىرۋعا بار كۇشىمدى سالامىن.

بيىلعى ماڭىزدى دودالار قارساڭىندا كوماندانىڭ الدىندا ۇلكەن ءبىر ماقسات تۇر. ءوز تاراپىمىزدان دايىندىققا قاجەتتى بارلىق جاعدايدى جاساۋدى جالعاستىرا بەرەمىز. بىرلەسە ەڭبەك ەتۋ ارقىلى وتاندىق بوكستىڭ الەمدىك ارەناداعى بەدەلىن نىعايتا تۇسەمىز.

بوكس – ءبىزدىڭ ۇلتتىق سپورتىمىز. قازاقستان بوكس فەدەراتسياسىنىڭ تىزگىنىن ۇستاۋ مەن ءۇشىن ابىرويلى دا، جاۋاپكەرشىلىگى زور مىندەت. ەل بوكسىنىڭ تۋىن تۇسىرمەي، قازاق بوكسىن الەمگە اسقاقتاتا بەرۋ ءۇشىن تاعى دا بار كۇش-جىگەرىمدى سالاتىنىمدى ايتامىن.

پاريج وليمپياداسىنا ىرىكتەۋ ءتۋرنيرىنىڭ قارساڭىندا كوماندانىڭ الدىندا جالعىز ماقسات تۇر. بۇگىنگە دەيىن قولعا الىنعان جۇمىستاردى جالعاستىرىپ، دايىندىققا بار كۇشىمىزدى سالامىز دەگەن ويدامىن. «جۇمىلا كوتەرگەن جۇك جەڭىل» دەگەندەي، بىرلەسىپ جۇمىس ىستەسەك، العا قويعان ماقساتتارعا جەتەرىمىزگە سەنىمدىمىن، — دەدى شاحمۇرات ءمۇتالىپ.

شاحمۇرات ءمۇتالىپ 1990 جىلى 18 قىركۇيەكتە الماتى وبلىسى كازتسينك اۋىلىندا تۋعان. ەكونوميكا عىلىمدارىنىڭ ماگيسترى، كۋالا-لۋمپۋرداعى (مالايزيا) ازيا-تىنىق مۇحيتى ۋنيۆەرسيتەتىندە (APU) ءبىلىم العان. كاسىپكەر، «Integra Construction KZ» جشس يەگەرى.  ۇيلەنگەن، 3 بالاسى بار.