SportPress.kz Qazaqstan sport jańalyqtary
Búgin Astanada Qazaqstan boks federaııasynyń jyldyq dástúrli jıyny boldy. Jıynda federaııanyń jańa prezıdenti bolyp Shahmurat Mútálip saılandy, dep habarlady federaııanyń baspasóz qyzmeti.
Ol bul qyzmette Keńes Raqyshevti almastyrdy. Jıynda qaýymdastyqtyń burynǵy basshysy Keńes Raqyshev ózi basshylyq etken tórt jylda atqarylǵan jumystar boıynsha esep berip, áriptesterine, boks jankúıerlerine alǵysyn bildirdi.
Federaııanyń jańadan saılanǵan prezıdenti Shahmurat Mútálip bul qyzmet ózine artylǵan zor senim ári úlken jaýapkershilik ekenin aıtty. Sondaı-aq, daýys berýshilerge alǵysyn bildirip, qazaq boksyn damytý, álemdik deńgeıdegi bedelin kóterý jolynda bar kúsh-jigerimen qyzmet etetinin jetkizdi.
Maǵan júktelgen jaýapkershilikti sezine otyryp, Qazaqstan boksyn ári qaraı damytýǵa, sportshylarymyzǵa jan-jaqty qoldaý kórsetip, olardyń múddesin qorǵaýǵa, QBF rolin el ishinde jáne halyqaralyq deńgeıde arttyrýǵa bar kúshimdi salamyn.
Bıylǵy mańyzdy dodalar qarsańynda komandanyń aldynda úlken bir maqsat tur. О́z tarapymyzdan daıyndyqqa qajetti barlyq jaǵdaıdy jasaýdy jalǵastyra beremiz. Birlese eńbek etý arqyly otandyq bokstyń álemdik arenadaǵy bedelin nyǵaıta túsemiz.
Boks – bizdiń ulttyq sportymyz. Qazaqstan boks federaııasynyń tizginin ustaý men úshin abyroıly da, jaýapkershiligi zor mindet. El boksynyń týyn túsirmeı, qazaq boksyn álemge asqaqtata berý úshin taǵy da bar kúsh-jigerimdi salatynymdy aıtamyn.
Parıj Olımpıadasyna irikteý týrnıriniń qarsańynda komandanyń aldynda jalǵyz maqsat tur. Búginge deıin qolǵa alynǵan jumystardy jalǵastyryp, daıyndyqqa bar kúshimizdi salamyz degen oıdamyn. «Jumyla kótergen júk jeńil» degendeı, birlesip jumys istesek, alǵa qoıǵan maqsattarǵa jeterimizge senimdimin, — dedi Shahmurat Mútálip.
Shahmurat Mútálip 1990 jyly 18 qyrkúıekte Almaty oblysy Kazınk aýylynda týǵan. Ekonomıka ǵylymdarynyń magıstri, Kýala-Lýmpýrdaǵy (Malaızııa) Azııa-Tynyq muhıty ýnıversıtetinde (APU) bilim alǵan. Kásipker, «Integra Construction KZ» JShS ıegeri. Úılengen, 3 balasy bar.
