وليمپيادا جولداماسىنا ءتورت تاەكۆوندوشى تالاسادى

15-16 ناۋرىز ارالىعىندا قىتايدىڭ تايان قالاسىندا تاەكۆوندودان پاريج وليمپياداسىنا جولداما تاراتاتىن ازيا ايماقتىق ىرىكتەۋ ءتۋرنيرى بولادى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسى.

قۇرلىق دوداسىندا 33 ەلدەن كەلگەن 96 سپورتشى قاتىسادى. تۋرنيرگە قازاقستاننان جاستار اراسىنداعى الەم چەمپيوناتىنىڭ قولا جۇلدەگەرى (2022)، سپارتاكيادا جەڭىمپازى، 17 جاستاعى باتىرحان تولەۋعالي (80 كگ)، ساميرحون اباباكيروۆ (58 كگ) قاتىسادى. ساميرحون 20 جاستا. ول — وليمپيادا رەيتينگىندە 39-ورىندا تۇر. سونىمەن بىرگە ءVى جازعى سپارتاكياداسىنىڭ جەڭىمپازى، وليمپيادا رەيتينگىندە 44-ورىندا كەلە جاتقان 19 جاستاعى ماريا سەۆوستيانوۆا (57 كگ) مەن ازيا ويىندارىنىڭ ەكى دۇركىن جۇلدەگەرى، وليمپيادا رەيتينگىندە 14-ورىن  تۇرعان 33 جاستاعى جانسەل دەنيز (+67 كەلى) كۇش سىناسادى.

تايانداعى تۋرنيردە ءار سالماقتا فينالعا شىققان سپورتشىلارعا ليتسەنزيا بەرىلەدى.

العاشقى جارىس كۇنى ەرلەر 68 كگ، 80 كگ، ال ايەلدەر 49 كگ، 67 كگ دەيىنگى سالماقتا جولداماعا تالاسادى. ۇلتتىق قۇراما ساپىنان ەرتەڭ تەك باتىرحان تولەۋعالي دايانگقا شىعادى. ول جەرەبە تارتۋ كەزىندە ۆ توبىنا ءتۇستى. باتىرحان ءبىرىنشى اينالىمدا اكشاي حۋدامەن ء(ۇندىستان) كۇش سىناسادى. جەڭىسكە جەتسە، جارتىلاي فينالدا وعان يندونەزيا نەمەسە ساۋد ارابياسىنىڭ تاەكۆوندوشىسى قارسىلاس بولادى.

بارلىعى 80 كگ دەيىنگى سالماقتا 9 سپورتشى بار. بۇگىن ولار رەسمي سالماق ولشەۋدەن ءوتتى.

دايىندىعىم جوسپارعا ساي ءوتتى. تۋرنيرگە دايىنمىن. ءيا، بۇل جارىستىڭ ورنى بولەك ەكەنى ايتپاسا دا تۇسىنىكتى. وليمپيالىق ويىنداردا باق سىناۋ كەز كەلگەن سپورتشىنىڭ ارمانى. ەرتەڭ بارىمدى سالامىن. ۇندىستاندىق سپورتشىمەن العاش رەت جولىعايىن دەپ تۇرمىن، — دەدى باتىرحان سپورتتى دامىتۋ ديرەكتسياسىنىڭ ءباسپاسوز قىزمەتىنە بەرگەن سۇحباتىندا.

قىتايداعى جارىس كەزىندە پاريج وليمپياداسىنىڭ جولداماسىنا ءار سالماقتا فينالعا شىققان ەكى سپورتشى يە بولادى.

قازاقستان 2004 جىلدان بەرى وليمپياداعا تاەكۆوندودان تۇراقتى تۇردە سپورتشى اپارىپ كەلەدى. وسى ۋاقىتقا دەيىن ەلىمىز وليمپيادادا ءبىر جۇلدە الدى. بەيجىڭ وليمپياداسىندا ارمان شىلمانوۆ قولا مەدالدى يەلەندى.