Lisbon half marathon – 2024: جەلاياق جۋرناليست تاعى جارىسقا شىقتى (فوتو)

بەلگىلى جۋرناليست، كاسىپكەر، بىلتىر اقش-تىڭ نيۋ-يورك قالاسىندا العاش بولىپ وتانداستارىمىزدىڭ اراسىندا التى مەيجور مارافوندى sub 3، ياعني ءۇش ساعات ىشىندە جۇگىرگەن ەرەنعايىپ قۋاتاي ۇلى پورتۋگاليانىڭ ليسسابون قالاسىندا ءوتىپ جاتقان Lisbon half marathon – 2024 مارافونىنا قاتىسىپ جاتىر.

كەشە ول مارافوندا جۇگىرىپ، مارەگە 1 ساعات 21 مينۋت 53 سەكۋندتتا جەتتى. ونىڭ ايتۋىنشا، ناتيجە جامان ەمەس. جالپى، ەۋروپادا ليسسابوننان باسقا تاعى بەس جارتى مارافون بار. ولار — پراگا، بەرلين، كارديفف، كوپەنگاگەن جانە ۆالەنتسيا.

كەشە  التى جارتىنى باستادىم. ناتيجە جامان ەمەس: 1:21:53.

Lisbon half marathon تولىق مارافوننان كەم بولعان جوق. الەمنىڭ ءار جەرىنەن 37 500 ادام قاتىسقان سۇراپىل جارىس بولدى. ايتپاقشى جارتى مارافوننىڭ الەمدىك رەكوردى وسى ليسسابون جارتى مارافونىنىڭ ەنشىسىندە. ەكى جىل بۇرىن ۋگاندالىق جەلاياق كيپليمو دجەيكوب 57:31 ناتيجەسىمەن تالايدىڭ تاڭدايىن قاقتىرعان بولاتىن.

بيىل ليسسابوندا كۇن ىستىق بولدى. سوعان بايلانىستى بولعان شىعار، الەم رەكوردى جاڭارماق تۇگىلى، وعان باقانداي 3 مينۋت جەتپەي قالدى. قالاي بولعاندا دا، ۇيىمداستىرۋ دەڭگەيى مەيجور مارافوننان ەش كەم بولعان جوق. تەك پۋبليكانىڭ اعىلشىندار سياقتى اگرەسسيۆتى قولداۋى جەتىسپەي قالعان سياقتى.

سونىمەن Superhalfs-تىڭ العاشقى مەدالى قالتادا. الدا ساۋىردە پراگا كۇتىپ تۇر، — دەدى ول.

ەرەنعايىپ قۋاتاي ۇلى – جوعارىدا اتاپ وتكەنىمىزدەي، العاش بولىپ وتانداستارىمىزدىڭ اراسىندا التى مەيجور مارافوندى sub 3، ياعني ءۇش ساعات ىشىندە جۇگىرگەن ازامات. ول بوستون، چيكاگو، نيۋ-يورك، بەرلين، لوندون، توكيو مارافوندارىندا، ياعني، التى مەيجوردى جۇگىرگەن التى ادامنىڭ ءبىرى.

مارافون تەك دالاقتاپ جۇگىرۋ ەمەس، ونىڭ دا فيلوسوفيالىق ءمانى بار. مارافون — جىگەر. مارافون — ءتارتىپ. مارافون — قايىرىمدىلىق. مارافون — ساياحات…، — دەيدى ەرەنعايىپ قۋاتاي ۇلى.

ءيا، شىنىمەن دە جەڭىل اتلەتيكا – سپورتتىڭ تورەسى. ول — فيلوسوفيا، ول – دەنساۋلىق كەپىلى. سول سەبەپتەن جەلاياق جۋرناليست حالىقتى بەلگىلى جەڭىلاتلەت ميحايل كراسيلوۆتىڭ Young runner كلۋبىنا مۇشە بولىپ مارافونعا دايىندالۋعا شاقىراتىنىن تاعى دا ايتتى.

داستان كەنجالين،

استانا