كوركەم گيمناستيكادان اچ: قازاقستان كوماندالىق ەسەپتە ەكىنشى ورىن الدى (فوتو)

وزبەكستاننىڭ استاناسى — تاشكەنت قالاسىندا كوركەم گيمناستيكادان ليتسەنزيالىق ازيا چەمپيوناتى اياقتالدى، دەپ حابارلادى تۋريزم جانە سپورت مينيسترلىگىنىڭ سپورتتى دامىتۋ ديرەكتسياسى.

سارى قۇرلىق دوداسىنىڭ سوڭعى كۇنى جەكەلەي جانە توپتىق جاتتىعۋلار بويىنشا فينال بولىپ، قازاقستان قۇراماسى 321.60 ۇپايمەن ەكىنشى ورىندى يەلەندى. جالپىكوماندالىق ەسەپتە ءبىرىنشى ورىندى  329.45 ۇپايمەن وزبەكستان گيمناسشىلارى السا، ءۇشىنشى ورىندى 316.85 ۇپاي جيناعان جاپونيا سپورتشىلارى قاناعات تۇتتى.

جەكەلەي سىندا ەلجاڭا تانيەۆا شىعىرشىق (33.90) ءبىرىنشى، تاسپا (31.05) ءتورتىنشى، ۇرشىق (30.80) بەسىنشى، دوپ (32.60) جاتتىعۋلارىندا ءۇشىنشى ورىندى يەلەندى. ايبوتا ەرتايقىزى شىعىرشىقپەن (33.25) ءۇشىنشى، تاسپامەن (32.90) ءبىرىنشى، ۇرشىقپەن (30.15) التىنشى، دوپپەن جاتتىعۋدا (32.65) ەكىنشى ورىنعا تابان تىرەدى. ال توپتىق باسەكەدە ەلىمىزدىڭ قۇراما كومانداسى (اياۋلىم كادىر، ارۋجان قالساەۆا، اقسۇڭقار ءابدىراحمان، بايان قويباقار، ماريا كورنيەنكو، سوفيا ان) بەس شىعىرشىق (32.10) پەن ەكى دوپ، ءۇش تاسپا جاتتىعۋلارىندا (29.65) قولا مەدالگە يە بولدى.

ارۋلارىمىز بۇگىن دە جاقسى ناتيجە كورسەتتى. بارلىعى ويداعىداي بولدى. ەڭ باستى ماقساتىمىزعا جەتتىك. بۇل دودادا كەشە ەلجاڭا تانيەۆا كوپسايىستا توپ جارىپ، وليمپيادا جولداماسىن جەڭىپ الدى. قۋانىشتىمىز! قولدا بار جاعدايدىڭ ءبارىن جاساعانى ءۇشىن باسشىلىققا العىس ايتامىن! ەندى ۇلكەن دايىندىقتى باستايمىز. بىلىكتى ماماندارمەن جانە پسيحولوگتارمەن بىرىگىپ جۇمىس ىستەيمىز، — دەدى كوركەم گيمناستيكادان باس جاتتىقتىرۋشى  اليا يۋسۋپوۆا.

ازيا چەمپيوناتىنا 17 ەلدەن 90-نان استام سپورتشى قاتىستى.