SportPress.kz قازاقستان سپورت جاڭالىقتارى
تۋريزم جانە سپورت ءمينيسترى ەرمەك مارجىقپاەۆ يران يسلام رەسپۋبليكاسىنىڭ سپورت جانە جاستار ءمينيسترى كيومارز حاشەميمەن ەكىجاقتى كەلىسسوز جۇرگىزدى، دەپ حابارلادى ۆەدومستۆو.
كەزدەسۋدە قازاقستان مەن يران اراسىنداعى جاس سپورتشىلاردى دايارلاۋ سالاسىنداعى ىنتىماقتاستىقتى ودان ءارى دامىتۋ ماسەلەلەرى تالقىلاندى.
بىلتىر ەكى ەلدىڭ مينيسترلەرى اراسىندا سپورت سالاسىنداعى ءوزارا ىنتىماقتاستىق تۋرالى مەموراندۋمعا قول قويعان بولاتىن. ەرمەك مارجىقپاەۆ بۇل قۇجات ەكى ەل اراسىنداعى قارىم-قاتىناستى جانداندىرۋعا ىقپال ەتەتىنىن اتاپ ءوتتى.
وزدەرىڭىز بىلەتىندەي، يراندا كۇرەس تۇرلەرى، اسىرەسە ەركىن جانە گرەك-ريم كۇرەسى وتە جاقسى دامىعان. سوندىقتان سىزدەرگە قازاقستان بالۋاندارىمەن بىرلەسكەن وقۋ-جاتتىعۋ جيىندارىن وتكىزۋدى ۇسىنامىز. مۇنداي تاجىريبە كۇرەستىڭ دامۋىنا وڭ اسەر ەتەتىنىنە سەنىمدىمىن. قازاقستان سپورتشىلارى قۇندى تاجىريبە جيناسا، جاتتىقتىرۋشىلار يراندىق سپورتشىلاردىڭ جاتتىعۋ جۇيەسىمەن تانىسا الادى. يران سپورتشىلارى وزدەرىنىڭ وقۋ-جاتتىعۋ جيىندارىن الماتىداعى وليمپيادالىق دايارلىق ورتالىعىنىڭ بازاسىندا وتكىزە الادى، — دەدى ەرمەك مارجىقپاەۆ.
سونىمەن قاتار ۆەدومستۆو باسشىسى كەزدەسۋدە يراندىق ارىپتەسىن وسى جىلدىڭ قىركۇيەك ايىندا استانادا وتەتىن 5-ءشى دۇنيەجۇزىلىك كوشپەندىلەر ويىندارىنىڭ اشىلۋ سالتاناتىنا قاتىسۋعا شاقىردى.
مينيستر يران قۇراماسىنىڭ كوشپەندىلەر ويىندارىنا سپورتتىڭ التى تۇرىنەن قاتىساتىنىن ايتتى. ولار: الىش، اشىرتمالى ابا گيۋرەشي، ءداستۇرلى ساداق اتۋ، جامبى اتۋ، كۋراش، قازاق كۇرەسى.
ءوز كەزەگىندە يران تاراپى ءوزارا ىنتىماقتاستىقتى جانداندىرۋ ءۇشىن استاناداعى دۇنيەجۇزىلىك كوشپەندىلەر ويىندارىنا قاتىسۋدى ۇيىمداستىرۋ بويىنشا جۇمىس توبىن قۇرۋدى ۇسىندى.
كەزدەسۋدە تۋريزم جانە سپورت ءمينيسترى ەرمەك مارجىقپاەۆتىڭ ۆەدومستۆونىڭ جانە ءوز اتىنان يران پرەزيدەنتى يبراحيم ءرايسيدىڭ قازاسىنا بايلانىستى پارسى ەلىنىڭ حالقىنا كوڭىل ايتتى.
