«ءبارىن دە ۋاقىت كورسەتەدى»: ستانيسلاۆ چەرچەسوۆ ۇلتتىق قۇراماعا باعا بەردى

فۋتبولدان قازاقستان قۇراماسىنىڭ باس جاتتىقتىرۋشىسى ستانيسلاۆ چەرچەسوۆ جاڭا قىزمەتكە تاعايىندالعان سوڭ العاش رەت باق وكىلدەرىنە سۇحبات بەردى. ول باس جاتتىقتىرۋشى قىزمەتىنە تاعايىنداۋىنا قاتىستى پىكىر ءبىلدىرىپ، الداعى جوسپارلارىن ايتتى.

مەن فەدەراتسيا باسشىلىعىمەن سويلەسىپ، العاشقى ەكى ويىنعا قاتىسپايمىن دەپ شەشتىك. بارلىعىن جوسپارلاۋ كەرەك. سەبەبى، ارمەنياعا ۇشۋعا مۇمكىندىگىم جوق. ويتكەنى، مەن بۇل كۇندەرى ۇلتتىق قۇراماعا باس جاتتىقتىرۋشى بولۋدى جوسپارلاماعان ەدىم. مەن ۆەنگرياعا ۇشۋدى جوسپارلاپ وتىرمىن. ول جاقتا كوماندانىڭ ازەربايجانمەن بولاتىن ويىنىن قارايمىن. جاتتىعۋ جۇمىستارىنا قاتىسپايمىن. وسى ەكى ويىندى رۋسلان بالتيەۆ قورىتىندىلايدى،  — دەدى چەرچەسوۆ.

سودان كەيىن ول باق وكىلدەرىنىڭ سۇراقتارىنا جاۋاپ بەردى. سۇراق-جاۋاپ پىشىنىندە بولعان شاعىن سۇحباتتا چەرچەسوۆكە مىناداي ساۋالدار قويىلدى.

– ستانيسلاۆ سالام ۇلى، قازاقستان قۇراماسىنىڭ باس جاتتىقتىرۋشى قىزمەتىنە تاعايىنداۋدان العان العاشقى اسەرىڭىز بەن ەموتسياڭىز قانداي؟

– العان اسەرلەر بار. الايدا ەموتسيام بايسالدى. بىر اپتا بۇرىن مەن بۇل تۋرالى بىلمەدىم. مىنە، تاعدىردىڭ جازۋىمەن بۇگىن وسىندامىن.

– قازاقستان قۇراماسىنىڭ باس جاتتىقتىرۋشىسى بولۋ ۇسىنىسىن قابىلداۋىڭىزعا قانداي نەگىزگى فاكتورلار اسەر ەتتى؟

– شامامەن ەكى اي بۇرىن مەن شەتەلدە جۇمىس ىستەگىم كەلمەيتىنىمدى ايتتىم. سودان كەيىن ۇسىنىستار بولدى. قازاقستان قۇراماسى مەنىڭ كونتسەپتسياما سايكەس كەلەدى دەپ ويلايمىن. مۇندا مەنى قفف پرەزيدەنتى ادىلەت بارمەنقۇلوۆ كۇتىپ الدى. ءبىز سويلەسىپ، قالاي جۇمىس ىستەۋ كەرەك ەكەنىن تۇسىندىك. جوبانى بىرىگىپ جاساۋ كەرەك دەپ شەشىم قابىلدادىق.

– قازاقستان فۋتبول فەدەراتسياسى قىسقا جانە ۇزاق مەرزىمدى پەرسپەكتيۆادا ءسىزدىڭ الدىڭىزعا قانداي ماقساتتار مەن مىندەتتەر قويىپ وتىر؟

— وتكەن ماۋسىمدا قازاقستان ۇلتتىق قۇراما كومانداسى ءساتتى وينادى. ەندى ءبىز ۋەفا ۇلتتار ليگاسىن قايتىپ اق پاراقتان باستايمىز. ۇلتتىق قۇراما استانادان الماتىعا كوشەدى. سەبەبى، «استانا ارەنا» ستاديونىندا جوندەۋ جۇمىستارى بولىپ جاتىر ەكەن. جىگىتتەرمەن سويلەستىم. ولارعا «ەڭ باستى مىندەت –تاجىريبەنى شىڭداي ءتۇسۋ كەرەك»، دەدىم.

قۇرامانىڭ ىرگەتاسى قالاندى. ەندى ونى كىرپىشپەن قالاۋ كەرەك. شارتتى تۇردە قازاق فۋتبولىنىڭ وركەندەۋىنە مۇمكىندىك بەرەتىن بەلگىلى ءبىر جۇيەنى قۇرۋ قاجەت. مەنىڭ مىندەتىمە ۇلتتىق قۇراما ەمەس، جاستار مەن جاسوسپىرىمدەر قۇرامالارىنىڭ دامىتۋ دا كىرەدى. ەندى ولارعا دا نازار اۋدارۋ قاجەت.

مەن كوماندامەن كەزدەستىم. جاتتىقتىرۋشىلار شتابىمەن سويلەستىم. ءبىر جىلدا كوپ نارسە وزگەرەدى. كوماندانىڭ الەۋەتى ءوسۋى كەرەك. كوماندا زاماناۋي فۋتبول كورسەتۋى قاجەت. قانشالىقتى تابىستى بولاتىنىمىزدى ۋاقىت كورسەتەدى.

ستانيسلاۆ چەرچەسوۆ وسى اپتادا فۋتبولدان قازاقستان ۇلتتىق قۇراماسىنىڭ باس جاتتىقتىرۋشىسى قىزمەتىنە تاعايىندالعان بولاتىن.

ونىڭ فۋتبولشى كەزىندە قاي كلۋبتا ويناپ،  جاتتىقتىرۋشى رەتىندە قاي كلۋبتا جۇمىس ىستەگەنى تۋرالى ايتساق، ول فۋتبولشى كەزىندە «سپارتاك» (وردجونيكيدزە)، «سپارتاك» (ماسكەۋ)، «لوكوموتيۆ» (ماسكەۋ)، «دينامو» (درەزدەن، گفر)، «تيرول» (ينسبۋرك، اۋستريا) كلۋبتارىندا ويناعان.

جاتتىقتىرۋشى رەتىندە رەسەيدىڭ «سپارتاك» (ماسكەۋ)، «جەمچۋجينا» (سوچي)، «تەرەك» (گروزنىي)، «امكار» (پەرم)، «دينامو» (ماسكەۋ)، «لەگيا» (ۆارشاۆا، پولشا)، «فەرەنتسۆاروش» (بۋداپەشت، ماجارستان) كوماندالارىندا جۇمىس ىستەگەن.

چەرچەسوۆ ۇلتتىق قۇراماعا باس جاتتىقتىرۋشى بولىپ تاعايىندالعاننان كەيىن الەۋمەتتىك جەلىدە ونىڭ جالاقىسى تۋرالى دا اڭگىمە كوبەيىپ كەتتى.

وسىعان بايلانىستى قازاقستان فۋتبول فەدەراتسياسى ستانيسلاۆ چەرچەسوۆتىڭ الاتىن جالاقىسى تۋرالى تاراعان اقپاراتقا قاتىستى رەسمي مالىمدەمە جاسادى.

كەيبىر اقپارات كوزدەرى چەرچەسوۆ جىلىنا 1،2 ملن ەۋروعا جۋىق اقشا الادى دەپ جازعان. الەۋمەتتىك جەلىدەگى اقپاراتقا قاراعاندا، ونىڭ ايلىعىن تەڭگەگە شاققاندا، 1 168 800 000 تەڭگە بولادى. قفف بۇل اقپاراتتى راستامادى.