Australian Open: ءامىر ومارحانوۆ ءۇشىنشى اينالىمعا شىقتى

17 جاستاعى تەننيسشى ءامىر ومارحانوۆ جاسوسپىرىمدەر اراسىندا ءوتىپ جاتقان اۋستراليا اشىق چەمپيوناتىنىڭ ءۇشىنشى اينالىمىنا شىقتى، دەپ حابارلادى قازاقستان تەننيس فەدەراتسياسى.

جاسوسپىرىمدەر اراسىندا الەمنىڭ 4-راكەتكاسى ومارحانوۆ ەكىنشى اينالىمدا اۋستراليالىق يۋمەرالي ءيبرايميدى جارىس جولىنان شىعاردى.

قازاقستان تەننيسشىسى ءبىرىنشى پارتيادا 6:4 ەسەبىمەن باسىم ءتۇستى. ەكىنشى سەتتە ەسەپ 5:2 بولعان كەزدە ماتچقا دوپ بەرگەنىمەن، سول مۇمكىندىگىن ءمۇلت جىبەردى. دەگەنمەن ويىندى تاعى ءبىر برەيكپەن ءتامامدادى. ەسەپ — 6:3.

ويىن 1 ساعات 35 مينۋتقا سوزىلدى.

ەندى جارىستىڭ 2-راكەتكاسى بولىپ تىركەلگەن ومارحانوۆ شيرەك فينالعا شىعۋ ءۇشىن شۆەتسيالىق تەننيسشى، 17 جاستاعى ۆيلليام رەجحتمان ۆينتسيگاررامەن وينايدى.