ءبىر كۇمىس، ەكى قولا جۇلدە: حانچجوۋدا پرەمەر-ليگا ءتۋرنيرى اياقتالدى

قىتايدىڭ حانچجوۋ قالاسىندا كاراتەدەن پرەمەر-ليگا ساناتىنداعى بيىلعى جىلدىڭ ەكىنشى جارىسى اياقتالدى، دەپ حابارلادى قازاقستان كاراتە فەدەراتسياسىنىڭ ءباسپاسوز قىزمەتى.

Karate 1-Premier League — وسى سپورتتاعى ەڭ بەدەلدى تۋرنير. وعان رەيتينگتەگى TOP-32 سپورتشى عانا جولداما الادى.

بۇل باسەكەدە قازاقستان قۇراماسىنىڭ ءۇش سپورتشىسى كۋميتە باعدارلاماسىندا جۇلدەگە يە بولدى. توپتا بارلىق قارسىلاسىن ۇتقان تۇڭعىش الەم چەمپيونى ءمولدىر جاڭبىرباي (-50 كگ) فينالدا الجير سپورتشىسى سيليا ۋيكەنمەن تەڭ ءتۇسىپ (8-8)، SENSHU ء(بىرىنشى ۇپاي العان سپورتشى جەڭىسى) بويىنشا ەسە جىبەردى.

ءمولدىر جاڭبىرباي قاڭتار ايىندا پاريجدە وتكەن جىلدىڭ العاشقى پرەمەر-ليگا تۋرنيرىندە قولا جۇلدەگەر اتانعان.

وسىدان كەيىن جارتىلاي فينالدا سۇرىنگەن اسەل قاناي (61 كگ) مەن سوفيا بەرۋلتسەۆا (+68 كگ) كىشى فينالدا قارسىلاسىن ۇتىپ، قولا مەدال يەلەندى. ەسكە سالا كەتەيىك، اسەل مەن سوفيا قىستا پاريجدە كۇمىس جۇلدە جەڭىپ العان.

بارلىعى بۇل جارىسقا 68 ەلدەن 400 سپورتشى قاتىستى. قازاقستان كومانداسى ساپىندا 13 كاراتەشى كۇش سىناستى.

حانچجوۋعا ەڭ كوپ سپورتشىنى جاپونيا قۇراماسى الىپ باردى (30 سپورتشى). ودان كەيىن تۋرنيرگە يتاليادان 29، فرانتسيا مەن تۇركيادان 21 ادامنان قاتىستى.

وسىدان سوڭ پرەمەر-ليگانىڭ (Karate 1-Premier League) كەلەسى كەزەڭى كاير (18-20 ءساۋىر) مەن رابات (30 مامىر — 1 ماۋسىم) قالاسىندا بولادى.

قازاقستان كاراتەشىلەرى پاريجدەگى جارىستا 2 كۇمىس، 3 قولا مەدال العان.