جاس تەننيسشىلەر وزبەكستانداعى جارىستا ۇزدىك شىقتى

وزبەكستاننىڭ فەرعانا قالاسىندا 12 جاسقا دەيىنگىلەر اراسىندا ازيا چەمپيوناتىنىڭ ورتالىق ازيا بويىنشا ىرىكتەۋ ءتۋرنيرى اياقتالدى. بۇل جارىستا قازاقستان قۇراماسى ۇزدىك ونەر كورسەتتى، دەپ حابارلادى قازاقستان تەننيس فەدەراتسياسى.

ەل نامىسىن ۇلداردان سىرىمجان بارلىقوۆ (اقتوبە)، ءامىرحان قۋانىشبەكوۆ، ەۆگەني ششەتنكيكوۆ (ەكەۋى دە الماتى) قورعادى. جارىسقا كوماندانىڭ كاپيتانى بولىپ رۋسلان ارەپرينتسەۆ قاتىستى.

قىزداردان مارتينا كۋرباتوۆا (الماتى)، ماريا گۋليا، ۆلادا دەگتيار (ەكەۋى دە استانا) سىنعا ءتۇستى. زارينا جۇماجانوۆا كوماندانىڭ كاپيتانى بولدى.

قىزدار وزبەكستان، قىرعىزستان، تۇركمەنستان كوماندالارىمەن ويناپ، بارلىعىندا جەڭىسكە جەتتى.

ۇلدار دا وسى ەلدەر قۇرامالارىن تىزە بۇكتىردى.

ءتۋرنيردىڭ قورىتىندىسى بويىنشا قازاقستاننىڭ قوس قۇراماسى بيىل كۇزدە سينگاپۋر ەلىندە 12 جاسقا دەيىنگىلەر اراسىندا وتەتىن ازيا كوماندالىق چەمپيوناتىنىڭ فينالدىق كەزەڭىنە جولداما الدى.