«قايرات» تۇڭعىش رەت چەمپيوندار ليگاسىنىڭ توپتىق تۋرنيرىنە شىقتى (ۆيدەو)

بۇگىن ارۋ قالا الماتى عانا ەمەس، بۇكىل قازاق دالاسى «قايرات» فۋتبول كلۋبى ءۇشىن بوركىن اسپانعا اتىپ، قۋانىپ جاتىر.

وسىدان ءسال عانا ۋاقىت بۇرىن الماتىنىڭ تەڭبىل دوپ كومانداسى شوتلانديانىڭ «سەلتيك» جاساعىن پەنالتي سەرياسىندا 3:2 ەسەبىمەن جەڭىپ، تۇڭعىش رەت چەمپيوندار ليگاسىنىڭ توپتىق تۋرنيرىنە شىقتى.

بۇعان دەيىن وسىدان 10 جىل بۇرىن «استانا» كلۋبى چەمپيوندار ليگاسىنىڭ توپتىق تۋرنيرىندە ويناعان بولاتىن. ەندى مىنە، «قايرات» دۇرمەكتى دودانىڭ نەگىزگى كەزەڭىنە جولداما العان ەكىنشى وتاندىق كوماندا بولىپ وتىر.

بۇگىنگى ماتچتا «قايرات» بارىن سالىپ وينادى. ويىنشىلار 120 مينۋت شارشاعانىنا قاراماستان اياققا تۇرىپ بەردى. ال كوماندانىڭ قاقپاشىسى تەمىرلان اناربەكوۆ تىپتەن جارادى. ول پەنالتي سەرياسىندا قارسىلاستىڭ قاقپاعا تەپكەن ءۇش دوبىن قايتارىپ، «قايراتقا» جەڭىس سىيلادى. ءيا، ءيا، جەڭىس سىيلادى دەسەك ارتىق ايتقاندىعىمىز ەمەس. سەبەبى، مۇنداي سىن ساعاتتا كوماندانىڭ جەڭىسى كوبىنەسە قاقپاشىعا بايلانىستى بولادى. كەزىندە اتاقتى جاتتىقتىرۋشى ۆالەري لوبانوۆسكي: «ەست ماتچي كوتورىە ۆىيگرىۆايۋت ۆراتاري»، دەگەن ەدى. سونىڭ ءسوزى – راس ءسوز. «قاقپاشىلار عانا جەڭەتىن ويىندار بولادى»، دەگەنى عوي.

توقسان اۋىز ءسوزدىڭ توبىقتاي ءتۇيىنىن ايتساق، بۇگىن بارلىق قازاق جانكۇيەرى «قايرات» ءۇشىن ىشكەن اسىن جەرگە قويىپ، ەكى ساعاتتان استام ۋاقىت بۇكىل جان دۇنيەسىمەن بولىسىپ وتىردى.  وسى نيەت، تىلەك قابىل بولىپ، قازاقتىڭ اڭىز كومانداسى جەڭىسكە جەتتى!

قۋان، قازاق! ەندى الاتاۋدىڭ باۋرايىندا جاتقان ارۋ قالامىز الماتىعا ەۋروپانىڭ مىقتى كوماندالارى كەلەدى. الماتى فۋتبول تويىنا اينالادى.

ەسكە سالوا كەتسەك، وسىعان دەيىن «قايرات» چەمپيوندار ليگاسىنىڭ العاشقى ءۇش ىرىكتەۋ كەزەڭىندە سلوۆەنيانىڭ «وليمپيا» (1:1، 2:0)، فينليانديانىڭ كۋپس كلۋبتارىن (0:2، 3:0)، سلوۆاكيانىڭ «سلوۆان» (1:0، 0:1، پەنالتيدەن 4:3) كومانداسىن جەڭگەن بولاتىن. سودان كەيىن شوتلانديانىڭ «سەلتيك» كلۋبىمەن جاسىل الاڭعا شىقتى. ال قازىر الماتىدا توي!

داستان كەنجالين،

استانا