«Qaırat» tuńǵysh ret Chempıondar lıgasynyń toptyq týrnırine shyqty (VIDEO)

Búgin arý qala Almaty ǵana emes, búkil qazaq dalasy «Qaırat» fýtbol klýby úshin bórkin aspanǵa atyp, qýanyp jatyr.

Osydan sál ǵana ýaqyt buryn Almatynyń teńbil dop komandasy Shotlandııanyń «Seltık» jasaǵyn penaltı serııasynda 3:2 esebimen jeńip, tuńǵysh ret Chempıondar lıgasynyń toptyq týrnırine shyqty.

Buǵan deıin osydan 10 jyl buryn «Astana» klýby Chempıondar lıgasynyń toptyq týrnırinde oınaǵan bolatyn. Endi mine, «Qaırat» dúrmekti dodanyń negizgi kezeńine joldama alǵan ekinshi otandyq komanda bolyp otyr.

Búgingi matchta «Qaırat» baryn salyp oınady. Oıynshylar 120 mınýt sharshaǵanyna qaramastan aıaqqa turyp berdi. Al komandanyń qaqpashysy Temirlan Anarbekov tipten jarady. Ol penaltı serııasynda qarsylastyń qaqpaǵa tepken úsh dobyn qaıtaryp, «Qaıratqa» jeńis syılady. Iá, ıá, jeńis syılady desek artyq aıtqandyǵymyz emes. Sebebi, mundaı syn saǵatta komandanyń jeńisi kóbinese qaqpashyǵa baılanysty bolady. Kezinde ataqty jattyqtyrýshy Valerıı Lobanovskıı: «Est matchı kotorye vyıgryvaıýt vratarı», degen edi. Sonyń sózi – ras sóz. «Qaqpashylar ǵana jeńetin oıyndar bolady», degeni ǵoı.

Toqsan aýyz sózdiń tobyqtaı túıinin aıtsaq, búgin barlyq qazaq jankúıeri «Qaırat» úshin ishken asyn jerge qoıyp, eki saǵattan astam ýaqyt búkil jan dúnıesimen bolysyp otyrdy.  Osy nıet, tilek qabyl bolyp, qazaqtyń ańyz komandasy jeńiske jetti!

Qýan, qazaq! Endi Alataýdyń baýraıynda jatqan arý qalamyz Almatyǵa Eýropanyń myqty komandalary keledi. Almaty fýtbol toıyna aınalady.

Eske saloa ketsek, osyǵan deıin «Qaırat» Chempıondar lıgasynyń alǵashqy úsh irikteý kezeńinde Slovenııanyń «Olımpııa» (1:1, 2:0), Fınlıandııanyń KýPS klýbtaryn (0:2, 3:0), Slovakııanyń «Slovan» (1:0, 0:1, penaltıden 4:3) komandasyn jeńgen bolatyn. Sodan keıin Shotlandııanyń «Seltık» klýbymen jasyl alańǵa shyqty. Al qazir Almatyda toı!

Dastan KENJALIN,

ASTANA