تارازدا زاماناۋي فۋتبول اكادەمياسى اشىلادى

قازاقستان فۋتبول فەدەراتسياسى بالالار-جاسوسپىرىمدەر فۋتبولى ينفراقۇرىلىمىن دامىتۋداعى جۇمىستارىن جالعاستىرۋدا. جاڭا فۋتبول اكادەمياسى تاراز قالاسىندا ورنالاسادى. اتالعان جوبا قفف-نىڭ جامبىل وبلىسى اكىمدىگى مەن تيمۋر ق ۇلىباەۆتىڭ Halyk قورى اراسىنداعى ۇشجاقتى مەموراندۋم اياسىندا ىسكە اسىرىلۋدا، دەپ حابارلادى قازاقستان فۋتبول فەدەراتسياسى.

22 قاراشادا جامبىل وبلىسى تاراز قالاسىندا جاڭا فۋتبول اكادەمياسىنىڭ ىرگەتاسىن قالاۋ سالتاناتى بولدى.

جيىنعا قفف باس حاتشىسى داۆيد لوريا، جامبىل وبلىسىنىڭ اكىمى ەربول قاراشوكەەۆ، Halyk قورىنىڭ اتقارۋشى ديرەكتورى عالىمبەك جاقسىلىقوۆ جانە وڭىردەگى سپورت ارداگەرلەرى مەن باسقا دا قالا تۇرعىندارى قاتىستى.

جامبىل وبلىسىندا بوي كوتەرەتىن زاماناۋي اكادەميادا ەلىمىزدىڭ ءار وڭىرىنەن ىرىكتەلگەن 100 تالانتتى فۋتبولشى تاربيەلەنەدى. بارلىق ينفراقۇرىلىم FIFA جانە UEFA ستاندارتتارىنا ساي بولىپ، بولاشاق چەمپيونداردىڭ كاسىبي دەڭگەيدە وسۋىنە تولىق جاعداي جاسالادى.

-قفف ۇلتتىق قۇرامانىڭ كەلەشەگىن تاربيەلەۋدە ءىرى باستامالاردى قولعا الدى. سونىڭ ءبىرى – بۇگىنگى اكادەميا قۇرىلىسى. مۇندا تاربيەلەنەتىن ءار بالا ۇلتتىق قۇراما جەيدەسىن كيىپ، قازاقستاننىڭ اتىن الەم ەلدەرى الدىندا اسقاقتاتارىنا سەنىمىم مول. سەبەبى بالالار مەن جاسوسپىرىمدەردىڭ جۇيەلى دايىندىعى — قازاقستان فۋتبولىنىڭ بولاشاعى. ءبىزدىڭ Halyk قورىمەن بىرگە حالىقارالىق ستاندارتتارعا ساي سالىناتىن اكادەميا قازاق فۋتبولىنىڭ دامۋىنا قوسىلعان زور ۇلەس بولماق. وسىنداي يگى ىستەر جالعاسىن تابا بەرەدى، — دەدى قفف باس حاتشىسى داۆيد لوريا.

مەموراندۋم اياسىندا Halyk قورى 3،5 ملرد تەڭگە ينۆەستيتسيا قۇيىپ، نىساندى جوبالاۋدان باستاپ تولىق ىسكە قوسىلعانعا دەيىنگى بارلىق كەزەڭدى جۇزەگە اسىرادى. سونداي-اق، قاراجات ينجەنەرلىك ينفراقۇرىلىمدى جۇرگىزۋدى، سپورت جابدىقتارىمەن، ينۆەنتارلارمەن مەن جيھازدارمەن جابدىقتاۋعا دا جۇمسالادى.

تاراپتار جوبانى بىرلەسە ىسكە اسىرۋ ءۇشىن ورتاق جول كارتاسى ازىرلەنەدى. اكادەميانىڭ جوبالىق شەشىمدەرى مەن تەحنيكالىق-ەكونوميكالىق زەرتتەۋلەر قازاقستان فۋتبول فەدەراتسياسى دايىنداعان تەحنيكالىق تاپسىرما نەگىزىندە جۇرگىزىلەدى.

-ءبىزدىڭ باستى ميسسيامىز – جاس ۇرپاققا جاڭا مۇمكىندىكتەر اشۋ. Halyk قورى تەك سپورتقا ينۆەستيتسيا جاساعان جوق، جاستاردىڭ ارمانىنا، ولاردىڭ كەلەشەگى جارقىن بولۋىنا قول ۇشىن سوزدىق. ءبىز قازاقستان فۋتبولىنىڭ جاڭا داۋىرىنە سەرپىن بەرۋگە ىقپال ەتكىمىز كەلەدى. بۇل جوبا مىڭداعان بالاعا شابىت سىيلاپ، ەل سپورتىنىڭ دامۋىنا ايتارلىقتاي ۇلەس قوسادى دەپ سەنەمىز، — دەدى Halyk قورىنىڭ اتقارۋشى ديرەكتورى عالىمبەك جاقسىلىقوۆ.

جاڭا فۋتبول اكادەمياسى جامبىل وبلىسىنداعى بالالار مەن جاسوسپىرىمدەر سپورتىن جاڭا دەڭگەيگە كوتەرەدى. ول ءوڭىر جاستارىنا دا كاسىبي فۋتبولعا جول اشىپ، ايماقتىڭ سپورتتىق الەۋەتىن ارتتىرۋعا ماڭىزدى ۇلەس قوسپاق.

-بۇل جوبا – جامبىل ءوڭىرىنىڭ سپورتتىق تاريحىنداعى جاڭا بەلەس. ءبىز ءوز جاستارىمىزعا ەڭ جاقسى جاعداي جاساۋدى ماقسات ەتىپ كەلەمىز. فۋتبول اكادەمياسى تەك ينفراقۇرىلىم ەمەس، بۇل – بالالاردىڭ ارمانىن جاقىنداتاتىن ۇلكەن مۇمكىندىك. ءار تالانتتىڭ الاڭدا جارقىراۋىنا باعىتتالعان ءار جوباعا جان-جاقتى قولداۋ كورسەتۋگە دايىنبىز، — دەدى  جامبىل وبلىسىنىڭ اكىمى ەربول قاراشوكەەۆ.

عيماراتتا ويىنشىلارعا ارنالعان جاتاقحانا، وقۋ سىنىپتارى، مەديتسينالىق ءبولىم، اكىمشىلىك بلوك، جابىق جانە اشىق بىرنەشە كاسىبي جاتتىعۋ الاڭى ورنالاسادى.

2026 جىلدىڭ سوڭىنا قاراي تالعار قالاسىندا 150 تاربيەلەنۋشىگە ارنالعان ۇلتتىق اكادەميانىڭ قۇرىلىسى اياقتالادى. ول فيفا-نىڭ تالانتتار اكادەمياسى مارتەبەسىن الدى. قازاقستان الەم بويىنشا اكادەمياسى جوعارى مارتەبە يە بولعان توعىزىنشى ەل اتاندى.