«بوكس — تەك شارشى الاڭدا ەمەس، ودان تىس جەردە دە كۇرەسەتىن سپورت ءتۇرى»: گولوۆكين باق وكىلىنىڭ سۇراقتارىنا جاۋاپ بەردى

گەننادي گولوۆكين يتاليانىڭ ريم قالاسىندا وتكەن كونگرەستە World Boxing فەدەراتسياسىنىڭ پرەزيدەنتى بولىپ سايلاندى. وسىلايشا قازاقستان تاريحىندا حالىقارالىق سپورت فەدەراتسياسىن باسقارىپ وتىرعان العاشقى قازاقستان ازاماتى اتاندى، دەپ حابارلادى ۇلتتىق وليمپيالىق كوميتەت.

Tengrinews.kz سايتىنا سۇحباتىندا World Boxing باسشىسى جاڭا قىزمەتىن قازاقستان ۇلتتىق وليمپيالىق كوميتەتىندەگى جۇمىسپەن ۇيلەستىرۋ جايلى، سونداي-اق اۋەسقوي بوكسقا ورالۋىنىڭ سەبەپتەرى مەن جاڭا لاۋازىمداعى نەگىزگى باعىتتارى تۋرالى ايتىپ بەردى.

– گەننادي گەنناديەۆيچ، جاڭا قىزمەتىڭىزبەن قۇتتىقتايمىز! سايلاۋ كەزىندە ءسىز ءبىلىم، تسيفرلاندىرۋ جانە سپورتشىلاردى قورعاۋ ماسەلەلەرىنە باسىمدىق بەرەتىن باعدارلاما ۇسىندىڭىز. ءسىزدىڭ ويىڭىزشا، بۇل الەمدىك بوكستى قالاي وزگەرتە الادى؟

– مۇنىڭ ءبارى ءبىر-بىرىمەن تىعىز بايلانىستى. ەشبىر تارماقتى الىپ تاستاۋعا بولمايدى. تسيفرلاندىرۋ دا، ءبىلىم بەرۋ دە — بوكستى دامىتۋداعى نەگىزگى باعىتتار. تورەشىلەردىڭ ءبىلىم دەڭگەيىن كوتەرۋ، ادامي فاكتوردى ازايتۋ، جاساندى ينتەللەكتىنى ەنگىزۋ، سپورتشىلاردىڭ قاۋىپسىزدىگىن كۇشەيتۋ كەرەك. ءبىز تەك كورەرمەن قىزىعۋشىلىعىن عانا ەمەس، سپورتشىلاردىڭ بوكستان كەيىنگى ءومىرىن دە ويلاۋعا ءتيىسپىز. بۇل حالىقتىڭ وسى سپورت تۇرىنە دەگەن كوزقاراسىن وزگەرتەدى.

– ءسىز Digital Ringside جۇيەسىن ەنگىزۋدى ۇسىنىپ وتىرسىز. بۇل باستاما اۋەسقوي بوكسقا دەگەن سەنىمدى قايتارۋ جانە جەمقورلىقپەن كۇرەس جولىنداعى باستى قادام بولا الا ما؟ سونىمەن قاتار بۇل جۇيە جانكۇيەرلەر ءۇشىن اشىق بولا ما؟

– ءيا، سولاي دەپ ويلايمىن. قازىرگى تاڭدا مۇنىڭ قاجەتتىلىگى ايقىن. سەبەبى مۇنداي جۇيەلەر باسقا سپورت تۇرلەرىندە بۇرىننان قولدانىلادى. ال وتكەن وليمپيالىق ويىندار مەن تۋرنيرلەردىڭ ناتيجەلەرى كورسەتكەندەي، بۇل جۇيە قاراپايىم كورەرمەن ءۇشىن تۇسىنىكتى. بارلىعى ەسەپتىڭ قالاي جۇرگىزىلەتىنىن جانە نە بولىپ جاتقانىن ءتۇسىندى. شارشى الاڭدا بولىپ جاتقان جاعدايلاردى ءتۇسىنۋ بوكستىڭ قىزىعۋشىلىعىن ارتتىرادى. ەرەجەلەر بارلىعىنا ورتاق. ياعني سوققىڭ قارسىلاسىڭا ءدال تيگەن بولسا، وندا ۇپاي ەسەپكە الىنادى.

– ادىلەتسىز تورەلىك كوبىنە بوكستاعى جەمقورلىق جۇيەسىنىڭ ءبىر بولىگى رەتىندە تالقىلانادى. قازاقستان بوكسشىلارى دا مۇنىمەن بىرنەشە رەت بەتپە-بەت كەلدى. ءسىز دە بۇل جاعىنان تىس قالعان جوقسىز – 2004 جىلعى وليمپياداداعى كۇمىس جۇلدەڭىز وتە داۋلى بولدى. ءوزىڭىزدىڭ جەكە تاجىريبەڭىز مۇنداي جاعدايلاردى تۇبەگەيلى جويۋعا دەگەن نيەتىڭىزگە قانشالىقتى اسەر ەتتى؟

– ادىلەتسىزدىكتى كەز كەلگەن سپورت تۇرىنەن بايقاۋعا بولادى. ءاردايىم بىردەڭە جاساۋعا، جۇيەدەن اۋىتقۋعا جول تابىلادى. ءبىزدىڭ ماقسات — مۇنداي جاعدايدى بارىنشا بولدىرماۋ جانە سونىڭ الدىن الۋ. ارينە، ونى تولىق جويۋ مۇمكىن ەمەس. ادامي فاكتوردى تولىق جوققا شىعارۋ مۇمكىن ەمەس: بىرەۋ جاڭا جۇيەگە دە بەيىمدەلۋگە تىرىسادى. بىراق جۇيە نەعۇرلىم اشىق ءارى تۇسىنىكتى بولسا، بارلىق سپورتشىلار مەن كوماندالار تەڭ جاعدايدا بولادى، بارلىعى ءۇشىن تالاپ بىردەي بولادى. ءبىز باقىلاپ، وزگەرىستەردى كورىپ، جاقسارتۋعا قاتىسامىز – جۇمىستىڭ ءوزى وسى.

ماعان كەلەر بولساق، ءدال وسى سەبەپپەن مەن كاسىبي بوكسقا اۋىستىم. ءيا، بۇل مەنىڭ بوكسقا قايتا ورالۋىما نەگىز بولدى. مۇنداي ادىلەتسىز، جەمقورلىققا تولى جاعدايلار وتە كوپ. بوكس — تەك شارشى الاڭدا ەمەس، ودان تىس جەردە دە كۇرەسەتىن سپورت ءتۇرى.

وليمپيالىق كوميسسياعا كەلگەندە، قازاقستان دەگەن قۇرامانىڭ بار ەكەنىن كوبى ەسىنە الدى. ءبىزدىڭ ءداستۇرىمىزدى، الەمدىك دەڭگەيدەگى كۇشىمىزدى قايتا مويىنداي باستادى. دەگەنمەن وليمپيالىق كوميسسياعا كەلگەندە، بىزگە اۋدارىلعان ەرەكشە نازارعا ساي ناتيجە بولعان جوق. سپورتشىلارىمىز باسقا قارسىلاستارىنان باسىم ەكەنىن دالەلدەي المادى. بىراق سوڭعى ءبىر-ەكى جىلدا ەرلەر مەن ايەلدەر قۇراماسىنىڭ ايتارلىقتاي دامىپ كەلە جاتقانى قۋانتادى.

كەرىسىنشە، مەن ءبىزدىڭ بوكسشىلارعا ايتار ەدىم: مەن كەلدىم، ەندى سىزدەرگە ەرەكشە نازار اۋدارىلادى، تيىسىنشە تالاپ تا كۇشەيەدى. قازاقستان وكىلى شارشى الاڭعا شىقسا، ءار ساتكە ءمان بەرىلەدى. بۇل — قوسىمشا جاۋاپكەرشىلىك. گولوۆكين كەلدى، ءبارىن جەڭىپ الادى دەپ ويلاۋ قاتە تۇسىنىك. سونداي-اق ءبىزدىڭ بوكسشىلار ءۇشىن الاڭدايتىندار دا وسى جاعدايدى تۇسىنسە دەيمىن. ەندى سپورتشىلار ءوز دەڭگەيىن كورسەتۋى ءتيىس، ءداستۇرىمىزدى قايتا قالپىنا كەلتىرۋ كەرەك.

– ءسىز قازاقستان ءۇشىن تالاي جۇمىس اتقاردىڭىز، ەندى دەمالۋعا دا بولار ەدى. بىراق الدىمەن قازاقستاننىڭ ۇلتتىق وليمپيالىق كوميتەتىن باسقاردىڭىز، ەندى الەمدىك بوكسقا ۇلكەن، جەكە قاتىسۋدى تالاپ ەتەتىن، تاجىريبەسىز ىسكە اسپايتىن رەفورمالار ۇسىندىڭىز. ءسىزدىڭ جەكە موتيۆاتسياڭىز نەدە؟

– جاي عانا ءبىر نارسەنى جاقسى تۇسىنەمىن، قانشالىقتى اسقاق ەستىلسە دە، مەنىڭ پىكىرىممەن ساناسادى. ادامدار مەنى تەك ايگىلى سپورتشى دەپ قانا تانىمايدى. مۇندا بىرنەشە فاكتور بار: الەمگە تانىلعان، وڭ ءيميدجى قالىپتاسقان ءارى حالىقارالىق تاجىريبەسى بار تۇلعا.  وعان قوسا 15 جىل بويى پروموۋتەرلىك كومپانيانى باسقارىپ، اۋەسقوي جانە كاسىبي بوكسشىلارمەن جۇمىس ىستەپ كەلەمىن. بۇل تانىمالدىلىق جانە وڭ يميدج.

ونىڭ ۇستىنە مەن بۇل جەرگە شەنەۋنىك نەمەسە «بىرەۋدىڭ قولداۋىمەن كەلگەن ادام» رەتىندە ەمەس، الەمدىك سپورتتىڭ ەڭ جوعارى دەڭگەيىندە ۇزاق جىل تاجىريبە جيناعان كاسىبي سپورتشى رەتىندە كەلدىم.

– ءسىز قازاقستان ءۇشىن كەزەكتى جەتىستىككە  جەتتىڭىز – حالىقارالىق فەدەراتسيانى باسقارعان العاشقى قازاقستان ازاماتى اتاندىڭىز.

– مەن بۇعان وتە قۋانىشتىمىن. ەل اتىنان وسىنداي مۇمكىندىككە يە بولعانىما شىن مانىندە ماقتانامىن. بارلىق جانكۇيەرگە جانە بۇل قادامنىڭ ەل ابىرويى مەن ءيميدجى ءۇشىن قانشالىقتى ماڭىزدى ەكەنىن جاقسى تۇسىنەتىن مەملەكەت باسشىسىنا العىسىمدى بىلدىرگىم كەلەدى.

– سونىمەن قاتار ءسىز قازاقستان ۇلتتىق وليمپيالىق كوميتەتىن باسقاراسىز. ەكى قىزمەتتى قاتار الىپ ءجۇرۋ قيىندىق تۋدىرماي ما؟

– جوق. ءبىر نارسەنى ايتا كەتەيىن: مەنى دۇرىس ەستىسىن – مەن ۇوك-تەن كەتكەلى جاتقان جوقپىن. مۇنى بارلىعى انىق ءتۇسىنسىن.

قازاقستان – مەنىڭ وتانىم. مەن ونى تانىستىرىپ، ونىڭ نامىسى ءۇشىن كۇرەسەمىن. بۇل – مەن ءۇشىن ۇلكەن مارتەبە. ءوز تانىمالدىلىعىمدى ەلىمىزدىڭ سپورتتىق بەدەلىن كوتەرۋ ءۇشىن بارىنشا پايدالانىپ ءجۇرمىن. سوندىقتان وسىعان قاتىستى استىرتىن اڭگىمەلەر توقتاۋى كەرەك.

ءبىز ۇلتتىق وليمپيادالىق كوميتەتتىڭ حالىقارالىق وليمپيادالىق كوميتەتپەن ءوزارا بايلانىسىن جاڭا دەڭگەيگە شىعاردىق. العا قويعان ناقتى ماقساتتار مەن اۋقىمدى جوسپارلار بار. ءوز ەركىممەن كەتۋ ويىمدا جوق جانە جوسپارىمدا دا جوق. حوك-تىڭ تولىق تۇسىنىستىگىنە، سەرىكتەستىك جانە ادامي قارىم-قاتىناسىنا، سەنىمى مەن قولداۋىنا سۇيەنە وتىرىپ، وزىمە ودان دا بيىك مىندەتتەر قويىپ وتىرمىن.

وكىلەتتىك مەرزىم بار، حالىقارالىق راسىمدەر بار. ءوز پوزيتسيامدى جانە مۇمكىندىكتەرىمدى جاقسى تۇسىنە وتىرىپ، ەل يميدجىنە نۇقسان كەلتىرگىم كەلمەيدى.

مەن قازاقستان سپورتى ءۇشىن الاڭدايمىن. بارلىق قازاقستاندىق سپورتشى ءۇشىن ۋايىمدايمىن. وزدەرىڭىز ايتقانداي، مەن كوپتەگەن تۋرنيرگە بارامىن. بىراق مەن سپورتشىلاردى تەك قىزمەتكەر رەتىندە قولدامايمىن. ولار ماعان شىنىمەن دە بەيجاي ەمەس، ءبىزدىڭ قارىم-قاتىناسىمىز وتە قۇندى. ويتكەنى مەن دە كەزىندە ءدال سولاردىڭ ورنىندا بولدىم. مەن جارىستارعا جاي عانا جىگەر بەرۋ ءۇشىن ەمەس، ءوز ۇلگى-ونەگەم ارقىلى شابىتتاندىرۋ ءۇشىن بارامىن.