«ەلدوس سمەتوۆ تاتاميگە ورالاما؟» سۇراققا ۇلتتىق قۇرامانىڭ وكىلى جاۋاپ بەردى

ەرتەڭ، 28 قاراشادا ءابۋ-دابيدە ء(باا) دزيۋدودان حالىقارالىق Grand Slam ءتۋرنيرى باستالادى. وسى ورايدا ۇلتتىق قۇرامانىڭ جاتتىقتىرۋشى-كەڭەسشىسى روبەرت مشۆيدوبازدە Olympic.kz سايتىنا سۇحباتىندا دايىندىقتىڭ جاي-جاپسارى جايلى ايتىپ، وزەكتى سۇراقتارعا جاۋاپ بەردى.

— ەر-ريادتا وتكەن جارىستا بەلدەسكەن سپورتشىلارعا باعا بەرسەڭىز. نەلىكتەن ءدال وسىنداي قۇرامدى شىعارۋدى ءجون كوردىڭىز؟

— يسلام ويىندارى ءبىز ءۇشىن ويداعىداي بولدى دەپ ويلايمىن. بۇعان دەيىنگى يسلام ويىندارىندا قازاقستان قۇراماسى نەبارى ءبىر قولا مەدال جانە ەكى بەسىنشى ورىن العان ەدى. بيىلعى ناتيجەمىز بۇدان الدەقايدا جاقسى: ءبىر التىن، ءۇش كۇمىس جانە ءۇش قولا جۇلدەنى يەلەندىك.

ارينە، ودان دا جاقسى ناتيجە كورسەتكىمىز كەلدى. اسىرەسە، 60 كەلى سالماقتا التىن جۇلدە الۋعا مۇمكىندىك بولدى. دەگەنمەن جالپى كوماندانىڭ ونەرىنە كوڭىلىم تولادى.

— ءابۋ-دابيدەگى جارىسقا كوشباسشىلار اتتاندى. نەلىكتەن وسى دودانى تاڭدادىڭىزدار؟

— بىرىنشىدەن، بۇل جولى جارىستىڭ دەڭگەيى جوعارى بولارىن الدىن الا ءبىلدىم. ەكىنشىدەن، يسلام ويىندارى جىل سوڭىنداعى سوڭعى دودا ەمەس. جەلتوقساندا ءبىزدى جالپى دايىندىق كەزەڭى كۇتىپ تۇر. ەگەر جاپونياداعى تۋرنيرگە قاتىسساق، ودان كەيىن بىردەن سول جيىنعا قاتىسۋعا ۋاقىت تا، مۇمكىندىك تە بولمايتىن ەدى.

سوندىقتان كەلەسى ماۋسىمعا دايىندىقتى ءدال قازىردەن باستاۋ قاجەت. كەلەر جىلى وتە كوپ جارىس بولادى. بيىل جارىسقا ءجيى قاتىسا المادىق. سەبەبى قۇراما تولىق دايىن بولعان جوق. وقۋ-جاتتىعۋ جيىندارىنا كوپ ۋاقىت بولدىك. ال الداعى جىلى بارلىق جارىستا ونەر كورسەتەمىز.

— جالپى بيىلعى ماۋسىمدى قالاي باعالار ەدىڭىز؟

— مەن ازىرگە بۇل جىلعا باعا بەرۋگە اسىقپايمىن. ماۋسىمنىڭ نەمەسە جەكەلەگەن جارىستاردىڭ ناتيجەسىن ەرتە سارالاعان دۇرىس ەمەس دەپ ويلايمىن. اۋەلى سپورتشىلارعا ءوزىن كورسەتۋ ءۇشىن مۇمكىندىك بەرۋىمىز كەرەك. وليمپيادالىق تسيكل اياقتالعان سوڭ عانا ناقتى قورىتىندى جاسايمىز. قازىردىڭ وزىندە ءوتىپ جاتقان جارىستاردىڭ ءبارى — ۇلكەن دايىندىقتىڭ ءبىر بولىگى عانا.

— ەلدوس سمەتوۆ قاشان ساپقا ورالادى؟ الداعى تۋرنيرلەرگە قاتىسا ما؟

— ەلدوس كەلەسى جىلى تاتاميگە ورالادى. ونى ەشقايدا اسىقتىرمايمىز. سپورتتىق بابىنا ەنىپ، قالپىنا كەلگەن سوڭ عانا قاي جارىسقا قاتىساتىنىن بىرگە اقىلداسىپ شەشەمىز.

— كەلەسى جىلعا قۇرام قالاي جاساقتالادى؟ قۇراماعا جاڭادان قوسىلاتىن بالۋانداردىڭ ىشىندە قازىردەن ناقتى اتاپ ايتا الاتىن ەسىمدەر بار ما؟

— جاقىندا قازاقستان چەمپيوناتى بولدى. سول جارىستىڭ ناتيجەسىنە قاراي قۇرامانى جاساقتاپ الدىق. كوماندادا ەل چەمپيوناتىنا قاتىسپاعان، بىراق نەگىزگى قۇرامعا كىرەتىن مىقتى سپورتشىلار دا بار. قازىر وتە جاقسى ۇجىم قالىپتاسىپ كەلەدى. بىزگە تەك ۋاقىت كەرەك. بارلىعى ويداعىداي بولارىنا سەنەمىن.

تاعى قايتالاپ ايتارىم: ءبىزدىڭ باستى ماقساتىمىز — وليمپيادا، ازيا ويىندارى جانە ءوز ەلىمىزدە بولاتىن الەم چەمپيوناتى. وسى ءۇش باستى دودانىڭ بارلىعىنا ءبىز 100 پايىز دايىن بولامىز.