SportPress.kz Qazaqstan sport jańalyqtary
Erteń, 28 qarashada Ábý-Dabıde (BAÁ) dzıýdodan halyqaralyq Grand Slam týrnıri bastalady. Osy oraıda ulttyq quramanyń jattyqtyrýshy-keńesshisi Robert Mshvıdobazde Olympic.kz saıtyna suhbatynda daıyndyqtyń jaı-japsary jaıly aıtyp, ózekti suraqtarǵa jaýap berdi.
— Er-Rııadta ótken jarysta beldesken sportshylarǵa baǵa berseńiz. Nelikten dál osyndaı quramdy shyǵarýdy jón kórdińiz?
— Islam oıyndary biz úshin oıdaǵydaı boldy dep oılaımyn. Buǵan deıingi Islam oıyndarynda Qazaqstan quramasy nebári bir qola medal jáne eki besinshi oryn alǵan edi. Bıylǵy nátıjemiz budan áldeqaıda jaqsy: bir altyn, úsh kúmis jáne úsh qola júldeni ıelendik.
Árıne, odan da jaqsy nátıje kórsetkimiz keldi. Ásirese, 60 keli salmaqta altyn júlde alýǵa múmkindik boldy. Degenmen jalpy komandanyń ónerine kóńilim tolady.
— Ábý-Dabıdegi jarysqa kóshbasshylar attandy. Nelikten osy dodany tańdadyńyzdar?
— Birinshiden, bul joly jarystyń deńgeıi joǵary bolaryn aldyn ala bildim. Ekinshiden, Islam oıyndary jyl sońyndaǵy sońǵy doda emes. Jeltoqsanda bizdi jalpy daıyndyq kezeńi kútip tur. Eger Japonııadaǵy týrnırge qatyssaq, odan keıin birden sol jıynǵa qatysýǵa ýaqyt ta, múmkindik te bolmaıtyn edi.
Sondyqtan kelesi maýsymǵa daıyndyqty dál qazirden bastaý qajet. Keler jyly óte kóp jarys bolady. Bıyl jarysqa jıi qatysa almadyq. Sebebi qurama tolyq daıyn bolǵan joq. Oqý-jattyǵý jıyndaryna kóp ýaqyt bóldik. Al aldaǵy jyly barlyq jarysta óner kórsetemiz.
— Jalpy bıylǵy maýsymdy qalaı baǵalar edińiz?
— Men ázirge bul jylǵa baǵa berýge asyqpaımyn. Maýsymnyń nemese jekelegen jarystardyń nátıjesin erte saralaǵan durys emes dep oılaımyn. Áýeli sportshylarǵa ózin kórsetý úshin múmkindik berýimiz kerek. Olımpıadalyq ıkl aıaqtalǵan soń ǵana naqty qorytyndy jasaımyz. Qazirdiń ózinde ótip jatqan jarystardyń bári — úlken daıyndyqtyń bir bóligi ǵana.
— Eldos Smetov qashan sapqa oralady? Aldaǵy týrnırlerge qatysa ma?
— Eldos kelesi jyly tatamıge oralady. Ony eshqaıda asyqtyrmaımyz. Sporttyq babyna enip, qalpyna kelgen soń ǵana qaı jarysqa qatysatynyn birge aqyldasyp sheshemiz.
— Kelesi jylǵa quram qalaı jasaqtalady? Quramaǵa jańadan qosylatyn balýandardyń ishinde qazirden naqty atap aıta alatyn esimder bar ma?
— Jaqynda Qazaqstan chempıonaty boldy. Sol jarystyń nátıjesine qaraı quramany jasaqtap aldyq. Komandada el chempıonatyna qatyspaǵan, biraq negizgi quramǵa kiretin myqty sportshylar da bar. Qazir óte jaqsy ujym qalyptasyp keledi. Bizge tek ýaqyt kerek. Barlyǵy oıdaǵydaı bolaryna senemin.
Taǵy qaıtalap aıtarym: bizdiń basty maqsatymyz — Olımpıada, Azııa oıyndary jáne óz elimizde bolatyn álem chempıonaty. Osy úsh basty dodanyń barlyǵyna biz 100 paıyz daıyn bolamyz.
