وننان استام ەل بىرىگىپ قازاق كۇرەسىن دامىتۋعا كەلىستى

ازەربايجاننىڭ استاناسى باكۋدە ءوتىپ جاتقان قازاق كۇرەسىنەن ەرەسەكتەر اراسىنداعى الەم چەمپيوناتى كەزىندە Qazaq Kuresi قاۋىمداستىعى مەن قاتىسۋشى ەلدەردىڭ ۇلتتىق فەدەراتسيا وكىلدەرى كەزدەستى، دەپ حابارلايدى Qazaq Kuresi قاۋىمداستىعىنىڭ ءباسپاسوز قىزمەتى.

باسقوسۋدا قازاق كۇرەسىنىڭ حالىقارالىق دەڭگەيدەگى دامۋى ءسوز بولىپ، 12 ەلدىڭ وكىلى ىنتىماقتاستىق تۋرالى مەموراندۋمعا قول قويدى.

جيىندى Qazaq Kuresi قاۋىمداستىعىنىڭ باس ديرەكتورى مەيىرجان بەرەكەتوۆ اشتى. ول ۇلتتىق فەدەراتسيا باسشىلارى مەن سپورت ۇيىمدارىنىڭ وكىلدەرىنە باكۋدەگى كەزدەسۋگە قاتىسقانى ءۇشىن العىسىن ءبىلدىرىپ، ەلدەر اراسىنداعى تۇراقتى ارىپتەستىك قازاق كۇرەسىنىڭ اياسىن كەڭەيتۋدە ايرىقشا مانگە يە ەكەنىن اتاپ ءوتتى.

«بۇگىنگى كەزدەسۋ حالىقارالىق ىنتىماقتاستىقتى نىعايتۋعا، ۇلتتىق فەدەراتسيالار اراسىنداعى دوستىق بايلانىستى دامىتۋعا جانە الداعى ءوزارا ءىس-قيمىل ءۇشىن جاڭا مۇمكىندىكتەر قالىپتاستىرۋعا باعىتتالعان. ءبىز ارىپتەستەرىمىزدىڭ قازاق كۇرەسىن دامىتۋعا دەگەن ىقىلاسى مەن ورتاق جۇمىسقا بەلسەندى ارالاسۋىن جوعارى باعالايمىز»، دەدى مەيىرجان بەرەكەتوۆ.

باسقوسۋدىڭ نەگىزگى بولىگى ىنتىماقتاستىق تۋرالى مەموراندۋمعا قول قويۋ راسىمىمەن جالعاستى. قۇجات ۇلتتىق فەدەراتسيالار اراسىنداعى ءوزارا ءىس-قيمىلدى كۇشەيتۋگە، سەرىكتەستىك اياسىن كەڭەيتۋگە جانە قازاق كۇرەسىن حالىقارالىق دەڭگەيدە بىرلەسە دامىتۋعا باعىتتالعان. مەموراندۋمعا گرۋزيا، ءۇندىستان، فيليپپين، يران، يتاليا، قىرعىزستان، ليتۆا، مولدوۆا، نيدەرلاند، پولشا، تاجىكستان جانە يندونەزيا وكىلدەرى قول قويدى. وسىلايشا، الەم چەمپيوناتىنا كەلگەن 12 ەل قازاق كۇرەسىن ىلگەرىلەتۋ باعىتىنداعى ورتاق جۇمىستى جالعاستىرۋعا ۋاعدالاستى.

«جيىندا يندونەزياداعى قازاق كۇرەسىنىڭ دامۋىنا دا نازار اۋدارىلدى. بيىل ەلدىڭ ۇلتتىق فەدەراتسياسى United World Wrestling (UWW) تاراپىنان رەسمي قاۋىمداستىرىلعان ۇيىم رەتىندە تانىلىپ، يندونەزيا اۋماعىندا قازاق كۇرەسىن دامىتۋعا جاۋاپتى قۇرىلىم مارتەبەسىن الدى.

وسىعان وراي UWW-ءدىڭ تەحنيكالىق دەلەگاتى ونۋر شيمشەك يندونەزيا فەدەراتسياسىنىڭ باسشىلىعىنا حالىقارالىق ۇيىمنىڭ ءتيىستى سەرتيفيكاتىن تابىستادى. بۇل قادام قازاق كۇرەسىنىڭ يندونەزيادا جۇيەلى تۇردە دامۋىنا جانە جەرگىلىكتى فەدەراتسيانىڭ حالىقارالىق بايلانىسىن كەڭەيتۋگە مۇمكىندىك بەرەدى»، دەلىنگەن حابارلامادا.

باكۋدەگى كەزدەسۋ ۇلتتىق فەدەراتسيالار اراسىنداعى بايلانىستى جاڭا مازمۇنمەن تولىقتىردى. تاراپتار الداعى ۋاقىتتا ورتاق جوبالاردى جۇزەگە اسىرىپ، قازاق كۇرەسىن ءوز ەلدەرىندە دامىتۋعا جانە حالىقارالىق دەڭگەيدەگى ىنتىماقتاستىقتى كەڭەيتۋگە ۋاعدالاستى.

بۇعان دەيىن 22-23 تامىز كۇندەرى ازەربايجاننىڭ استاناسى باكۋ قالاسىندا قازاق كۇرەسىنەن ەرەسەكتەر اراسىنداعى XII الەم چەمپيوناتىنىڭ جالاۋ كوتەرەتىنىن حابارلاعان ەدىك. قازىر وعان 30-عا جۋىق ەلدەن 300-دەن استام بالۋان قاتىسىپ جاتىر.

ەكى كۇنگە جوسپارلانعان جارىستا ەرلەر مەن ايەلدەر 16 سالماق دارەجەسى بويىنشا كۇش سىناسادى.