رىباكينا رەسمي تۇردە الەمنىڭ ءبىرىنشى راكەتكاسى اتاندى

قازاقستاننىڭ ايەلدەر اراسىنداعى جەكەلەي سىنداعى ءبىرىنشى راكەتكاسى ەلەنا رىباكينا ايەلدەر تەننيسى قاۋىمداستىعىنىڭ (WTA) الەمدىك رەيتينگىندە رەسمي تۇردە كوش باستادى.

تەننيس فەدەراتسياسىنىڭ حابارلاۋىنشا، رىباكينادا رەيتينگ جاڭارتىلعاننان كەيىن 9 901 ۇپاي بار. ول ەكىنشى ورىننان ءبىرىنشى ورىنعا كوتەرىلىپ، 7 875 ۇپايمەن ەكىنشى ساتىدا تۇرعان ارينا سوبولەنكودان وزدى.

تەننيسشىلەر اراسىنداعى ايىرماشىلىق 2 026 ۇپاي بولدى. ۇزدىك ۇشتىكتە 7 265 ۇپايمەن امەريكالىق دجەسسيكا پەگۋلا تۇر.

«اقش-تىڭ اشىق چەمپيوناتى (US Open-2026) ءبىرىنشى ورىن ءۇشىن شەشۋشى تۋرنير بولدى. رىباكيناعا قىتايلىق چجەن تسينۆەندى جەڭىپ، جارتىلاي فينالعا شىققاندا ءتۋرنيردىڭ كەيىنگى ناتيجەلەرىنە قاراماستان الەمدىك رەيتينگتەگى كوشباسشىلىقتى قامتاماسىز ەتتى. US Open باستالعان كەزدە ءبىرىنشى ورىنعا ارينا سوبولەنكو، دجەسسيكا پەگۋلا مەن كوكو گاۋفف تا تالاسقان بولاتىن.

كەيىن رىباكينا الەمنىڭ ءبىرىنشى راكەتكاسى مارتەبەسىن يەلەنىپ قانا قويماي، ءتۋرنيردى چەمپيوندىق اتاقپەن اياقتادى. فينالدا ول ارينا سوبولەنكونى 6:4، 5:7، 6:2 ەسەبىمەن جەڭدى. بۇل وتانداسىمىزدىڭ US Open تۋرنيرىندەگى العاشقى جانە مانسابىنداعى «ۇلكەن دۋلىعا» جارىستارىنداعى ءۇشىنشى تيتۋلى بولدى»، دەلىنگەن حابارلامادا.

وسىلايشا، 27 جاستاعى ەلەنا رىباكينا WTA تاريحىندا الەمدىك رەيتينگتىڭ ءبىرىنشى ساتىسىنا كوتەرىلگەن 30-شى تەننيسشى اتاندى. سونداي-اق ول ەرلەر مەن ايەلدەر اراسىندا جەكەلەي سىندا الەمدىك رەيتينگتە كوش باستاعان قازاقستاننىڭ تۇڭعىش وكىلى بولدى.

بۇعان دەيىن حابارلانعانداي، ەلەنا رىباكينا اقش-تىڭ اشىق چەمپيوناتىنىڭ فينالىندا  ءۇشىنشى رەت «ۇلكەن دۋلىعا» ءتۋرنيرىنىڭ جەڭىمپازى اتاندى. ول بەلارۋس وكىلى ارينا سوبولەنكونى جەڭگەن ەدى.

رىباكينا US Open تۋرنيرىندەگى جەڭىسى ءۇشىن 5،5 ميلليون دوللار سىياقى الدى.

داستان كەنجالين،

استانا