ازيا پارا ويىندارىنا 150 سپورتشى اتتانادى

18-24 قازان ارالىعىندا جاپونيانىڭ ايچي پرەفەكتۋراسى مەن ناگويا قالاسىندا تىرەك-قيمىل اپپاراتى، كورۋ قابىلەتى زاقىمدانعان جانە زياتكەرلىك دامۋ ەرەكشەلىكتەرى بار سپورتشىلار اراسىندا V ازيا پارا ويىندارى وتەدى. دوداعا 45 ەلدەن 4 مىڭعا جۋىق سپورتشى قاتىسىپ، سپورتتىڭ 18 تۇرىنەن 502 مەدالدى ساراپقا سالادى.

ەلىمىزدىڭ ۇلتتىق قۇراماسى ساپىنداعى 150 ويىنشى سپورتتىڭ 12 ءتۇرى بويىنشا ونەر كورسەتەدى، 1 كوماندالىق، 11 جەكەلەي سپورت تۇرىنەن ەل نامىسىن قورعايدى. اتاپ ايتقاندا، ۆولەيبولدى وتىرىپ ويناۋدان – 12، پارا تاەكۆوندودان – 8، پارا دزيۋدودان – 26، پارا ۇستەل تەننيسىنەن – 12، پارا وق اتۋدان – 12، پارا جەڭىل اتلەتيكادان – 14، پارا ساداق اتۋدان – 9، پارا جۇزۋدەن – 21، ارباداعى تەننيستەن – 3، پارا پاۋەرليفتينگتەن – 15، بوچچادان – 5، پارا ۆەلوسپورتتان 13 سپورتشى قاتىسادى.

بيىلعى ويىنداردا ەل قۇراما­سى ارباداعى تەننيستەن العاش رەت باق سىنايدى. سونىمەن قاتار پارا جە­ڭىل اتلەتيكادان زياتكەرلىك دامۋ­ ەرەك­شەلىكتەرى بار سپورت­شى­لار­ دا تۇڭ­عىش رەت قاتىسقا­لى وتىر.

«ويىندار الدىنداعى دايىن­دىق كەزىندە سپورتشىلارىمىز­ 23 وقۋ-جاتتىعۋ جيىنىنا قاتىسىپ، 22 حالىقارالىق تۋرنيردە 63 مەدال جەڭىپ الدى. بۇل جارىس­تا دا سپورتشىلارىمىز ءوز شەبەرلىكتەرىن بارىنشا تانىتىپ، لايىقتى ناتيجەگە قول جەتكىزەدى دەپ سەنەمىز»، دەپ مالىمدەدى دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعىنىڭ سپورت جونىندەگى باسقارماسىنىڭ باسشىسى قايراتبەك سەيىتبەكوۆ.

V ازيا پارا ويىندارىنىڭ العاشقى جارىستارى 16 قازاندا پارا ۇستەل تەننيسىنەن باستالادى. رەسمي اشىلۋ سالتاناتى 18 قازاندا ناگويا قالاسىنىڭ ­ميد­زۋحو جەڭىل اتلەتيكا ستاديونىندا وتەدى.

جالپى، ەلىمىز ازيا پارا ويىن­­دارىندا 2010 جىلدان بەرى قاتى­سىپ كەلەدى. سودان بەرگى جارىستار بارىسىندا 105 مەدال – 20 التىن، 35 كۇمىس، 50 قولا مەدال جەڭىپ الدى.

2010 جىلى 63 سپورتشى جارىستىڭ 6 تۇرىنەن باق سىناپ، 2 كۇمىس، 5 قولا جۇلدە يەلەندى. ال 2014 جىلى وڭتۇستىك كورەيانىڭ ينچحون قالاسىندا 78 سپورتشى 9 سايىس تۇرىنەن جارىسىپ، 24 مەدالعا (7 التىن، 6 كۇمىس، 11 قولا) يە بولسا، 2018 جىلى يندونەزيا استاناسى دجاكارتادا وتكەن III ازيا پارا ويىندارىندا 90 سپورتشىمىز 9 سپورت تۇرىنەن باق سىناپ، 33 مەدال (5 التىن، 15 كۇمىس، 13 قولا) جەڭىپ الدى.

2023 جىلى قىتايدىڭ حانچجوۋ قالاسىندا وتكەن سوڭعى ازيا پارا ويىندارىندا ەل نامىسىن قورعاعان 131 سپورتشى رەكوردتىق 41 مەدالدى (8 التىن، 12 كۇمىس، 21 قولا) ەنشىلەدى.

داستان كەنجالين،

استانا