SportPress.kz قازاقستان سپورت جاڭالىقتارى
استاناداعى «Qazaqstan» جەڭىل اتلەتيكالىق سپورت كەشەنىندە قازاقستاننىڭ ۇلتتىق كومانداسىن V ازيا پارا ويىندارى – ايچي-ناگويا 2026 جارىستارىنا شىعارىپ سالۋعا ارنالعان سالتاناتتى ءراسىم ءوتتى.
بۇل دۇرمەكتى دودا 18-24 قازان ارالىعىندا جاپونيانىڭ ايچي پرەفەكتۋراسى مەن ناگويا قالاسىندا وتەدى. سالتاناتتى ءىس-شاراعا تۋريزم جانە سپورت ءمينيسترى ەربول مىرزابوسىنوۆ، ۇلتتىق پاراليمپيادا كوميتەتىنىڭ وكىلدەرى، سپورت ارداگەرلەرى، جاتتىقتىرۋشىلار، قوعام قايراتكەرلەرى مەن باسقا دا قۇرمەتتى قوناقتار قاتىستى.
ءىس-شارانىڭ شىمىلدىعىن تۋريزم جانە سپورت ءمينيسترى ەربول مىرزابوسىنوۆ اشىپ، ۇلتتىق قۇراما سپورتشىلارىنا الداعى جارىستا ساتتىلىك تىلەدى.
«V ازيا پارا ويىندارىنىڭ باستالۋىنا ساناۋلى كۇندەر قالدى. بۇگىندە ەلىمىزدىڭ سپورتشىلارىنا مەملەكەت تاراپىنان جان-جاقتى قولداۋ كورسەتىلىپ، جارىسقا تىڭعىلىقتى دايىندالۋىنا بارلىق جاعداي جاسالدى. بيىل 12 سپورت تۇرىنەن سپورتشىلارىمىز 23 وقۋ-جاتتىعۋ جيىنىن وتكىزىپ، 22 حالىقارالىق تۋرنيرگە قاتىستى. وسى جارىستاردىڭ ناتيجەسىندە 63 مەدال جەڭىپ الدى. بۇل – سپورتشىلارىمىزدىڭ تىنىمسىز ەڭبەگى مەن جۇيەلى دايىندىعىنىڭ ناتيجەسى. سپورتشىلاردىڭ جاقسى ناتيجەگە جەتۋى ءۇشىن جاقسى دايىندىقپەن قاتار، قاجەتتى الەۋمەتتىك قولداۋدى قامتاماسىز ەتۋ دە اسا ماڭىزدى. وسى باعىتتا ەلىمىزدە زاڭنامالىق دەڭگەيدە ءى توپتاعى مۇگەدەكتىگى بار سپورتشىلاردى سۇيەمەلدەيتىن تۇلعالاردىڭ مارتەبەسى بەكىتىلدى. بۇل قولداۋ شارالارىن جۇزەگە اسىرۋعا 2025-2027 جىلدارعا جالپى 1،5 ميلليارد تەڭگە قاراستىرىلعان.
الداعى ازيا پارا ويىندارىنا ۇلتتىق قۇرامامەن بىرگە 38 ەرىپ ءجۇرۋشى اتتانادى. بۇل سپورتشىلارىمىزدىڭ جارىستارعا تولىققاندى قاتىسۋىنا جانە ءوز مۇمكىندىكتەرىن بارىنشا كورسەتۋىنە جاعداي جاسايدى. الداعى ويىنداردا بارشا سپورتشىلارىمىزعا ساتتىلىك تىلەيمىن! ەلىمىزدىڭ كوك تۋىن بيىكتە جەلبىرەتىپ، وتانىمىزدىڭ نامىسىن ابىرويمەن قورعايتىندارىڭىزعا سەنەمىن. ءاربىر جەڭىس – ەل ءۇشىن ۇلكەن ماقتانىش!»، دەپ اتاپ ءوتتى ەربول مىرزابوسىنوۆ.
سالتاناتتى ءراسىمنىڭ ماڭىزدى ساتتەرىنىڭ ءبىرى — قازاقستان رەسپۋبليكاسىنىڭ مەملەكەتتىك تۋىن ۇلتتىق قۇرامانىڭ تۋ ۇستاۋشىلارىنا تابىس ەتۋ بولدى. ويىنداردىڭ اشىلۋ سالتاناتىندا مەملەكەتتىك تۋدى الىپ شىعۋ قۇرمەتىنە پاريج-2024 پاراليمپياداسىنىڭ قولا جۇلدەگەرى، پارا جەڭىل اتلەتيكادان الەم چەمپيونى داستان مۇقاشبەكوۆ پەن پارا دزيۋدودان الەم چەمپيوناتىنىڭ بىرنەشە دۇركىن جۇلدەگەرى ايالا يە بولدى.
ۇلتتىق قۇراما سپورتشىلارىنىڭ اتىنان داستان مۇقاشبەكوۆ سالتاناتتى انت بەردى.
«قازاقستاننىڭ مەملەكەتتىك تۋىن ازيا پارا ويىندارىندا الىپ شىعۋ — مەن ءۇشىن ۇلكەن مارتەبە. ەلىمىزدىڭ كورسەتكەن ەرەكشە سەنiمiن باعالاپ جانە ءوزiمنiڭ جاۋاپكەرشiلiگiمدi سەزiنە وتىرىپ، ازيا پارا ويىندارىندا ەلىمىزدىڭ نامىسىن لايىقتى قورعاپ، جاقسى ناتيجەگە جەتۋ ءۇشiن ءوزiمنiڭ جەڭiسكە دەگەن بار كۇش-جiگەرiمدi جۇمسايمىن»، دەدى قۇراما تۋ ۇستاۋشىسى.
V ازيا پارا ويىندارى – ايچي-ناگويا 2026 جارىستارىندا قازاقستان اتىنان 12 سپورت تۇرىنەن 150 سپورتشى باق سىنايدى. ولار پارا جەڭىل اتلەتيكا، پارا دزيۋدو، پارا ۇستەل تەننيسى، پارا ساداق اتۋ، پارا وق اتۋ، پارا ۆەلوسپورت، ۆولەيبولدى وتىرىپ ويناۋ، پارا تاەكۆوندو، پارا ءجۇزۋ، پارا پاۋەرليفتينگ، بوچچا جانە ارباداعى تەننيس بويىنشا ونەر كورسەتەدى. وعان قوسا، سالتاناتتى ءىس-شارادا ەلىمىزدىڭ ۇلتتىق پاراليمپيادالىق كومانداسىنىڭ العاشقى رەسمي ماسكوتى — «جەڭىستىڭ» تانىستىرىلىمى ءوتتى. ول قازاقستاننىڭ قىزىل كىتابىنا ەنگىزىلگەن قاراقال — دالا سىلەۋسىنى بەينەسىندە جاسالعان. ماسكوتتىڭ باستى ەرەكشەلىگى — ءبىر اياعىنداعى سپورتتىق پروتەزى. ول ادام رۋحىنىڭ كۇشىن، قايسارلىق پەن شەكسىز مۇمكىندىكتەردى بەينەلەيدى.
قازاقستان پارا سپورتشىلارىنىڭ العاشقى رەسمي ماسكوتى — «جەڭىس» Vietjet Qazaqstan كومپانياسىنىڭ قولداۋىمەن ۇلتتىق قۇراماعا تابىس ەتىلدى. كومپانيا بۇل باستاما ارقىلى الداعى بايراقتى دودا قارساڭىندا سپورتشىلارعا قولداۋ كورسەتىپ، ولاردىڭ جەڭىسكە دەگەن جىگەرىن ارتتىرۋدى كوزدەدى. جەڭىس ويىنداردا سپورتشىلارعا سەرىك بولىپ، كوماندالىق رۋحتى نىعايتىپ، پارا سپورتشىلاردىڭ جەتىستىكتەرىن كەڭىنەن ناسيحاتتاۋعا ىقپال ەتەتىن بولادى.
V ازيا پارا ويىندارىنىڭ اشىلۋ سالتاناتى 18 قازاندا وتەدى. جارىسقا ازيانىڭ 45 ەلى مەن وڭىرىنەن شامامەن 4000-عا جۋىق سپورتشى قاتىسادى.
ويىندار اياسىندا سپورتتىڭ 18 تۇرىنەن جارىستار ءوتىپ، 502 مەدالدار جيىنتىعى ساراپقا سالىنادى.
بۇعان دەيىن ەلىمىز ازيا پارا ويىندارىنا 2010 جىلدان بەرى قاتىسىپ كەلە جاتقانىن حابارلاعان ەدىك. سودان بەرگى جارىستاردا سپورتشىلار 105 مەدال – 20 التىن، 35 كۇمىس، 50 قولا مەدال جەڭىپ الدى. ال جاقىندا فرانتسيانىڭ پاريج قالاسىندا پارا تاەكۆوندودان تىرەك-قيمىل اپپاراتى زاقىمدانعان سپورتشىلار اراسىندا وتكەن Paris 2026 World Para Taekwondo Grand Prix Series تۋرنيرىندە نۇرلان دومباەۆ جەڭىمپاز اتانسا، جانبولات قازيەۆ قولا جۇلدەگە يە بولدى.
داستان كەنجالين،
استانا
