SportPress.kz Qazaqstan sport jańalyqtary
Astanadaǵy «Qazaqstan» jeńil atletıkalyq sport kesheninde Qazaqstannyń ulttyq komandasyn V Azııa Para oıyndary – Aıchı-Nagoıa 2026 jarystaryna shyǵaryp salýǵa arnalǵan saltanatty rásim ótti.
Bul dúrmekti doda 18-24 qazan aralyǵynda Japonııanyń Aıchı prefektýrasy men Nagoıa qalasynda ótedi. Saltanatty is-sharaǵa Týrızm jáne sport mınıstri Erbol Myrzabosynov, Ulttyq paralımpıada komıtetiniń ókilderi, sport ardagerleri, jattyqtyrýshylar, qoǵam qaıratkerleri men basqa da qurmetti qonaqtar qatysty.
Is-sharanyń shymyldyǵyn Týrızm jáne sport mınıstri Erbol Myrzabosynov ashyp, ulttyq qurama sportshylaryna aldaǵy jarysta sáttilik tiledi.
«V Azııa Para oıyndarynyń bastalýyna sanaýly kúnder qaldy. Búginde elimizdiń sportshylaryna memleket tarapynan jan-jaqty qoldaý kórsetilip, jarysqa tyńǵylyqty daıyndalýyna barlyq jaǵdaı jasaldy. Bıyl 12 sport túrinen sportshylarymyz 23 oqý-jattyǵý jıynyn ótkizip, 22 halyqaralyq týrnırge qatysty. Osy jarystardyń nátıjesinde 63 medal jeńip aldy. Bul – sportshylarymyzdyń tynymsyz eńbegi men júıeli daıyndyǵynyń nátıjesi. Sportshylardyń jaqsy nátıjege jetýi úshin jaqsy daıyndyqpen qatar, qajetti áleýmettik qoldaýdy qamtamasyz etý de asa mańyzdy. Osy baǵytta elimizde zańnamalyq deńgeıde I toptaǵy múgedektigi bar sportshylardy súıemeldeıtin tulǵalardyń mártebesi bekitildi. Bul qoldaý sharalaryn júzege asyrýǵa 2025-2027 jyldarǵa jalpy 1,5 mıllıard teńge qarastyrylǵan.
Aldaǵy Azııa Para oıyndaryna ulttyq quramamen birge 38 erip júrýshi attanady. Bul sportshylarymyzdyń jarystarǵa tolyqqandy qatysýyna jáne óz múmkindikterin barynsha kórsetýine jaǵdaı jasaıdy. Aldaǵy oıyndarda barsha sportshylarymyzǵa sáttilik tileımin! Elimizdiń kók týyn bıikte jelbiretip, Otanymyzdyń namysyn abyroımen qorǵaıtyndaryńyzǵa senemin. Árbir jeńis – el úshin úlken maqtanysh!», dep atap ótti Erbol Myrzabosynov.
Saltanatty rásimniń mańyzdy sátteriniń biri — Qazaqstan Respýblıkasynyń Memlekettik týyn ulttyq quramanyń tý ustaýshylaryna tabys etý boldy. Oıyndardyń ashylý saltanatynda Memlekettik týdy alyp shyǵý qurmetine Parıj-2024 Paralımpıadasynyń qola júldegeri, para jeńil atletıkadan álem chempıony Dastan Muqashbekov pen para dzıýdodan álem chempıonatynyń birneshe dúrkin júldegeri Aıala ıe boldy.
Ulttyq qurama sportshylarynyń atynan Dastan Muqashbekov saltanatty ant berdi.
«Qazaqstannyń Memlekettik týyn Azııa Para oıyndarynda alyp shyǵý — men úshin úlken mártebe. Elimizdiń kórsetken erekshe senimin baǵalap jáne ózimniń jaýapkershiligimdi sezine otyryp, Azııa Para oıyndarynda elimizdiń namysyn laıyqty qorǵap, jaqsy nátıjege jetý úshin ózimniń jeńiske degen bar kúsh-jigerimdi jumsaımyn», dedi qurama tý ustaýshysy.
V Azııa Para oıyndary – Aıchı-Nagoıa 2026 jarystarynda Qazaqstan atynan 12 sport túrinen 150 sportshy baq synaıdy. Olar para jeńil atletıka, para dzıýdo, para ústel tennısi, para sadaq atý, para oq atý, para velosport, voleıboldy otyryp oınaý, para taekvondo, para júzý, para paýerlıftıng, bochcha jáne arbadaǵy tennıs boıynsha óner kórsetedi. Oǵan qosa, saltanatty is-sharada elimizdiń ulttyq paralımpıadalyq komandasynyń alǵashqy resmı maskoty — «Jeńistiń» tanystyrylymy ótti. Ol Qazaqstannyń Qyzyl kitabyna engizilgen qaraqal — dala sileýsini beınesinde jasalǵan. Maskottyń basty ereksheligi — bir aıaǵyndaǵy sporttyq protezi. Ol adam rýhynyń kúshin, qaısarlyq pen sheksiz múmkindikterdi beıneleıdi.
Qazaqstan para sportshylarynyń alǵashqy resmı maskoty — «Jeńis» Vietjet Qazaqstan kompanııasynyń qoldaýymen ulttyq quramaǵa tabys etildi. Kompanııa bul bastama arqyly aldaǵy baıraqty doda qarsańynda sportshylarǵa qoldaý kórsetip, olardyń jeńiske degen jigerin arttyrýdy kózdedi. Jeńis oıyndarda sportshylarǵa serik bolyp, komandalyq rýhty nyǵaıtyp, para sportshylardyń jetistikterin keńinen nasıhattaýǵa yqpal etetin bolady.
V Azııa Para oıyndarynyń ashylý saltanaty 18 qazanda ótedi. Jarysqa Azııanyń 45 eli men óńirinen shamamen 4000-ǵa jýyq sportshy qatysady.
Oıyndar aıasynda sporttyń 18 túrinen jarystar ótip, 502 medaldar jıyntyǵy sarapqa salynady.
Buǵan deıin elimiz Azııa para oıyndaryna 2010 jyldan beri qatysyp kele jatqanyn habarlaǵan edik. Sodan bergi jarystarda sportshylar 105 medal – 20 altyn, 35 kúmis, 50 qola medal jeńip aldy. Al jaqynda Franııanyń Parıj qalasynda para taekvondodan tirek-qımyl apparaty zaqymdanǵan sportshylar arasynda ótken Paris 2026 World Para Taekwondo Grand Prix Series týrnırinde Nurlan Dombaev jeńimpaz atansa, Janbolat Qazıev qola júldege ıe boldy.
Dastan KENJALIN,
ASTANA
