Astanada at ústinen sadaq atýdan álem chempıonaty ótedi

30 mamyr men 2 maýsym aralyǵynda «Han-shatyr» kesheni mańynda ótetin  «Nur-Sultan Ethno Fest» merekesi aıasynda at ústinen sadaq atýdan tuńǵysh álem chempıonaty tý kóteredi, dep habarlady Ulttyq sport qaýymdastyǵy.

Nur-Sultan qalasynda alǵash ret  uıymdastyrylatyn «Nur-Sultan Ethno Fest»  merekesinde elordalyqtar men qala qonaqtary tamashalaıtyn qyzyqtar mol. Atalmysh merekeni tamashalaýǵa qolaıly bolý úshin «Han-shatyr» kesheniniń mańynda, Turan dańǵylynyń boıynda aýqymdy etno-qalashyq boı kóteredi. Bul etno-qalashyq – úlken sahnadan, ulttyq qolóner buıymdarynyń saýda orny men birneshe kórmelerden, balalar men eresekterge arnalǵan ulttyq oıyndar ótetin sporttyq alańdardan, tórt túlik pen asyl tuqymdy  janýarlardy qyzyqtaıtyn shaǵyn saraılardan, ulttyq jıhazdarmen jabdyqtalǵan birneshe kıiz úılerden turady. Tórt kún boıy tamashalanatyn bul merekede ótkiziletin aýdaryspaq, sadaq atý, arqan tartý, asyq atý sııaqty kóptegen ulttyq oıyndardyń qatysýshylaryna marapattaý men júldeli syılyqtar tabys etiledi. Sondaı-aq, osy kúnderi etno-qalashyqqa kelgen búldirshinderge   altybaqanda terbelý, ponı attarǵa minip serýendeý sııaqty qyzyqtar tegin kórsetiledi.

Mine, osy «Nur-Sultan Ethno Fest»  merekesi aıasynda  jamby atýdan «Altyn jebe» atty tuńǵysh  álem chempıonaty tý kóteredi. Mádenıet jáne sport mınıstrliginiń jyldyq kúntizbelik josparyna sáıkes ótkiziletin bul dúnıejúzilik mergender saıysynyń alańy  etno-qalashyq aýmaǵynda ornalasqan.

Eske salyp ótsek, buǵan deıin jamby atýdan «Altyn jebe» básekesi elorda tórinde eki márte halyqaralyq týrnır retinde ótkizildi. Atalmysh  jarysty dúnıejúzilik deńgeıge kóterý maqsatynda bıylǵy jyly at ústinen sadaq atýdan I álem chempıonaty uıymdastyrylady. Álemdik deńgeıdegi saıysqa  Azııa memleketterimen qatar Ońtústik Afrıka, Malaızııa, Ońtústik Koreıa, Iordanııa, Rýmynııa, Fınlıandııa, Polsha, Vengrııa syndy elderdiń ataqty mergenderi qatysady. I álem chempıonatynyń mergendik básekeleri «Azııa stıli», «Túrik stıli» jáne jamby atý erejeleri boıynsha ótkiziledi. Aıta ketsek, «Nur-Sultan Ethno Fest»  merekesi aıasyndaǵy «Altyn jebe» I álem chempıonatyn Nur-Sultan qalasy ákimdigi men Ulttyq sport qaýymdastyǵy birlese uıymdastyrýda.