SportPress.kz قازاقستان سپورت جاڭالىقتارى
ستۋدەنتتەردىڭ سپورتتىق شەبەرلىگى مەن جەڭىسكە دەگەن جىگەرىن سىنايتىن دودا شىعىستىڭ عۇلاما عالىمى ءال-ءفارابيدىڭ 1150 جىلدىعىنا ارنالىپ وتىر. ۋنيۆەرسيادا ەرلەر مەن قىزدار اراسىنداعى قىسقى پرەزيدەنتتىك كوپسايىستان باستالدى، دەپ حابارلادى ءبىلىم جانە عىلىم مينيسترلىگى «ۇلتتىق عىلىمي-پراكتيكالىق دەنە تاربيەسى ورتالىعىنىڭ» ءباسپاسوز قىزمەتى.
ونىڭ سالتاناتتى اشىلۋ راسىمىنە شقمتۋ رەكتورى جاسۇلان شايماردانوۆ، ءبىلىم جانە عىلىم مينيسترلىگى «ۇلتتىق عىلىمي-پراكتيكالىق دەنە تاربيەسى ورتالىعىنىڭ» باس ديرەكتورى سادىق مۇستافاەۆ، قازاقستان ۇلتتىق ستۋدەنتتىك سپورت وداعىنىڭ باس حاتشىسى جاسنۇر اقەدىلوۆ، باس تورەشى بولاتبەك ءدۇسىپوۆ قاتىسىپ، سپورتتى جانىنا سەرىك ەتكەن جاستارعا ساتتىلىك تىلەدى.
– شىعىستىڭ كيەلى جەرىنە، كەندى التاي جۇرەگى وسكەمەن قالاسىنا قوش كەلدىڭىزدەر. ءبىلىمدى جاستار جانە سپورتشىلارىمىز ارقاشاندا ەلدىڭ ابىرويىن اسقاقتاتىپ، الەمدىك ارەناداعى بەدەلىن ساقتاپ، نىعايتۋعا ۇلەس قوسىپ كەلەدى. سىزدەر سولاردىڭ ءىزىن باسىپ كەلە جاتىرسىزدار. تەك قانا جەڭىس تىلەيمىن، ءبىز سىزدەرگە جانكۇيەر بولامىز، – دەدى شقمتۋ رەكتورى جاسۇلان شايماردانوۆ.
قازاقستاننىڭ تۇكپىر-تۇكپىرىنەن جينالعان ستۋدەنتتەر ءۇش كۇن بويى سپورتتىڭ بىرنەشە ءتۇرى بويىنشا سايىسقا تۇسەدى.
بۇگىن قاتىسۋشىلار شاڭعىمەن جارىس جولىنا شىقتى. الدا ءالى كۇش گيمناستيكاسى جانە وق اتۋدان جارىس كۇتىپ تۇر. ۋنيۆەرسيادا قورىتىندىسى بويىنشا 2021 جىلى وتەتىن XXX قىسقى ۋنيۆەرسيادا ويىندارىنا سپورتشىلار ىرىكتەلەتىن بولادى.
